టీంఇండియా డ్రెస్సింగ్ రూంలో మోడీ.. పిక్స్ & ట్వీట్స్ వైరల్!
ప్రత్యేకంగా డ్రెస్సింగ్ రూం కి వచ్చి మాలో స్థైర్యాన్ని పెంచినందుకు ప్రధాని నరేంద్ర మోడీకి ధన్యవాదాలు. మేము తిరిగి పుంజుకుంటాము" అని తెలిపాడు.
By: Tupaki Desk | 20 Nov 2023 5:20 PM GMT
వన్డే ప్రపంచ కప్ 2023 టోర్నీలో అత్యుత్తమ ప్రదర్శనతో ఆకట్టుకున్న టీం ఇండియా ఓటమి ఎరుగకుండా ఫైనల్ కు చేరింది. లీగ్ దశలో 9కి 9 మ్యాచ్ లు గెలవడంతోపాటు.. సెమీస్ లోనూ తనదైన విక్టరీ సాధించింది. ఆ విధంగా ఫైనల్ కు చేరిన టీం ఇండియా.. ఆసిస్ చేతిలో ఓటమి పాలయ్యింది. ఈ సందర్భంగా కోట్లమంది క్రికెట్ అభిమానులతో పాటు టీం ఇండియా ప్లేయర్లు కన్నీటిపర్యంతమయ్యారు. ఈ సమయంలో ఓటమి అనంతరం ప్రధాని మోడీ డ్రెస్సింగ్ రూం కి వెళ్లారు.
అవును... వరల్డ్ కప్ 2023లో లీగ్ లో ఆడిన అన్ని మ్యాచ్ లలో గెలిచి పాయింట్ల పట్టికలో టాప్ ప్లేస్ లో నిలిచిన టీం ఇండియా ఫైనల్ లో తడబడిన సంగతి తెలిసిందే. ఈ సమయంలో ఈ ఓటమిని జీర్ణించుకోలేక ఆటగాళ్లు మైదానంలో తీవ్ర భావోద్వేగానికి లోనయ్యారు. ఈ సమయంలో టీం ఇండియా ఆటగాళ్లకు భరోసానిచ్చి, ఉత్సాహపరిచేందుకు ప్రధాని నరేంద్ర మోడీ డ్రెస్సింగ్ రూం కు వెళ్లారు.
ఈ విషయాన్ని సోషల్‌ మీడియాలో వెల్లడిస్తూ ఆల్‌ రౌండర్‌ రవీంద్ర జడేజా... ప్రధానితో ఉన్న ఫొటోను పంచుకున్నాడు. ఈ సందర్భంగా... "ఈ టోర్నమెంట్‌ లో అద్భుతంగా రాణించినప్పటికీ.. మేం నిరాశతో ముగించాం. నిన్నటి ఫలితంతో మా గుండె బద్దలైంది. కానీ, మీ మద్దతుతోనే మేం ముందుకు సాగగలుగుతున్నాం. ప్రధాని మోడీ మా డ్రెస్సింగ్ రూంకు రావడం చాలా ప్రత్యేకంగా అనిపించడంతోపాటు ఎంతో ప్రేరణనిచ్చింది" అని రాసుకొచ్చాడు.
ఇదే సమయంలో ఈ టోర్నీలో బౌలింగ్ విభాగంలో అద్భుతంగా రాణించిన షమీ కూడా ఒక ఫొటోను షేర్ చేశాడు. ఈ సందర్భంగా ప్రధానికి కృతజ్ఞతలు తెలిపాడు. మళ్లీ బలంగా తిరిగొస్తామని పేర్కొన్నాడు. ఈ సందర్భంగా షమీ షేర్ చేసిన ఫోటోలో ప్రధాని అతడిని ఆప్యాయంగా దగ్గరకు తీసుకుని ఓదార్చినట్లు ఉండటం గమనార్హం.
ఈ సందర్భంగా స్పందించిన షమీ... "దురదృష్టవశాత్తు నిన్న మన రోజు కాదు. టోర్నీ అంతటా మా జట్టుకు, నాకు మద్దతుగా నిలిచినందుకు భారతీయులందరికీ ధన్యవాదాలు తెలియజేస్తున్నాను. ప్రత్యేకంగా డ్రెస్సింగ్ రూం కి వచ్చి మాలో స్థైర్యాన్ని పెంచినందుకు ప్రధాని నరేంద్ర మోడీకి ధన్యవాదాలు. మేము తిరిగి పుంజుకుంటాము" అని తెలిపాడు.
ఇలా టీం ఇండియా డ్రెస్సింగ్ రూంను ప్రధాని మోడీ సందర్శించడం.. ఆటగాళ్లను ఓదార్చాడం, ధైర్యం నింపేలా మాట్లాడటం, దీనికి సంబంధించిన ఫోటోలు షేర్ చేసుకోవడం వైరల్ గా మారింది. దీంతో.. "నిన్నటి బాదను మరిచిపోయి.. రేపటి సంతోషం కోసం పరుగెట్టడమే జీవితం" అంటూ కామెంట్లు పెడుతున్నారు నెటిజన్లు!
