చరిత్ర సృష్టించిన రవీంద్ర జడేజా.. నెక్స్ట్ కపిల్ దేవ్ రికార్డే!

ఇంగ్లండ్ తో జరుగుతున్న మూడు వన్డేల సిరీస్ లో భాగంగా... తొలి మ్యాచ్ నాగపూర్ వేదికగా జరుగుతున్న సంగతి తెలిసిందే. ఈ మ్యాచ్ లో టాస్ గెలిచి బ్యాటింగ్ ఎంచుకున్న ఇంగ్లాండ్ జట్టు.. 47.4 ఓవర్లలో 248 పరుగులకు ఆలౌటైంది. ఈ మ్యాచ్ లో టీమిండియా లెఫ్ట్ హ్యాండ్ స్పిన్నర్ రవీంద్ర జడేజా మూడు వికెట్లు దక్కించుకోవడంతో దిగ్గజాల సరసన చేరాడు.

అవును... టీమిండియా ఆల్ రౌండర్ రవీంద్ర జడేజా సరికొత్త రికార్డ్ సృష్టించాడు. ఇందులో భాగంగా... అంతర్జాతీయ క్రికెట్ చరిత్రలో 600 వికెట్లు తీసిన తొలి భారత లెఫ్ట్ హ్యాండ్ ఆర్థోడాక్స్ స్పిన్నర్ గా నిలిచాడు. ఇదే సమయంలో... ఇండియా – ఇంగ్లాండ్ మధ్య వన్డేల్లో అత్యదిక వికెట్ల వీరుడు జేమ్స్ ఆండర్సన్ - 40 రికార్డును అధిగమించాడు.

ఈ జాబితాలో టీమిండియా లెజెండరీ స్పిన్నర్ అనిల్ కూంబ్లే 953 వికెట్లతో భారత్ తరుపున అత్యధిక వికెట్లు తీసిన జాబితాలో అగ్రస్థానంలో ఉండగా.. తర్వాత స్థానంలో ఇటీవల అన్ని ఫార్మేట్ల నుంచి రిటైర్మెంట్ ప్రకటించిన రవిచంద్రన్ అశ్విన్ 765 వికెట్లతో రెండో స్థానంలో ఉన్నాడు. హర్భజన్ సింగ్ 707 వికెట్లతో మూడో స్థానంలో నిలిచారు.

వీరి అనంతరం టీమిండియా దిగ్గజ క్రికెటర్, మాజీ కెప్టెన్, లెజెండరీ ఆటగాడు కపిల్ దేవ్ 687 వికెట్లు పడగొట్టి నాలుగో స్థానంలో ఉన్నారు. వీరి తర్వాత 323 టెస్ట్ వికెట్లు, 54 టీ20 వికెట్లు, 223 వన్డే వికెట్లు కలిపి 600 వికెట్లతో కపిల్ దేవ్ తర్వాత స్థానంలో ఉన్నాడు రవీంద్ర జడేజా.

అంతర్జాతీయ క్రికెట్ లో భారత్ - ఇంగ్లాండ్ మధ్య వన్డేల్లో అత్యధిక వికెట్లు తీసిన బౌలర్ల జాబితాను పరిశీలిస్తే... రవీంద్ర జడేజా - 42 వికెట్లతో ఫస్ట్ ప్లేస్ లో ఉండగా.. జేమ్స్ ఆండర్సన్ - 40, ఆండ్రూ ఫ్లింటాఫ్ - 37, హర్భజన్ సింగ్ - 36, జవగల్ శ్రీనాథ్ & రవిచంద్రన్ అశ్విన్ - 35 వికెట్లతో వరుస స్థానాల్లో ఉన్నారు.

అంతర్జాతీయ క్రికెట్ లో అత్యధిక వికెట్లు తీసిన టీమిండియా బౌలర్లు!:

అనిల్ కుంబ్లే - 953 వికెట్లు (401 మ్యాచ్ లు)

రవి చంద్రన్ అశ్విన్ - 765 వికెట్లు (287 మ్యాచ్ లు)

హర్భజన్ సింగ్ - 707 వికెట్లు (365 మ్యాచ్ లు)

కపిల్ దేవ్ - 687 వికెట్లు (365 మ్యాచ్ లు)

రవీంద్ర జడేజా - 600 వికెట్లు (325* మ్యాచ్ లు)