ఐపీఎల్ పై టీమిండియా స్టార్ ఆల్ రౌండర్ సంచలన నిర్ణయం

సాధారణ ఆల్ రౌండర్ గా జట్టులోకి వచ్చి.. స్టార్ గా ఎదిగి, టీమిండియాలోకీ ఎంపికై.. అక్కడా రాణించి.. కెప్టెన్ కూడా అయిన స్టార్ ఆల్ రౌండర్ కీలక నిర్ణయం తీసుకున్నట్లు తెలుస్తోంది. ఐపీఎల్ కొత్త ఫ్రాంచైజీని మొదటి ప్రయత్నంలోనే విజేతగా నిలిపి.. రెండోసారి త్రుటిలో టైటిల్ కోల్పోయిన అతడు ఆ ఫ్రాంచైజీని వదిలిపెట్టనున్నట్లు స్పష్టమవుతోంది. అటు టీమిండియా, ఇటు ఐపీఎల్ ఫ్రాంచైజీలో రెండు చోట్లా కీలక ఆటగాడైన అతడి తాజా నిర్ణయం హాట్ టాపిక్ గా మారింది. సొంత రాష్ట్ర ఫ్రాంచైజీని వదిలివెళ్లడం ఎంతైనా చర్చనీయాంశమే.

2015కు ముందు.. ఇప్పుడు

టీమిండియాకు రెండు దశాబ్దాల తర్వాత నిరీక్షణ తర్వాత సమర్థుడైన పేస్ ఆల్ రౌండర్ హార్దిక్ పాండ్యా రూపంలో దొరికాడు. గుజరాత్ కు చెందిన ఇతడు ముంబై ఇండియన్స్ కు 2015లో ఎంపికయ్యాడు. అదే అతడి కెరీర్ టర్నింగ్ పాయింట్. అప్పటివరకు ఎవరికీ తెలియని అతడు.. ముంబై ఇండియన్స్ కు ఆడడం మొదలుపెట్టాక దశ తిరిగింది. ఆ జట్టు టైటిల్స్ కొట్టడంలో కీలక పాత్ర పోషించాడు. అయితే, 2022లో అనూహ్యంగా గుజరాత్ టైటాన్స్ కు వెళ్లిపోయి కెప్టెన్ గా పగ్గాలు చేపట్టాడు. ఆ సీజన్ లో సమష్టి పోరాటంతో చాంపియన్ గా నిలిచిన టైటాన్స్ ఈ ఏడాది ఫైనల్ చేరింది. దీనిప్రకారం పాండ్యా మళ్లీ టైటాన్స్ సారథిగానే కొనసాగే అవకాశం ఉందని భావించారు. కానీ, అతడు ముంబైకి తిరిగి రానున్నట్లు కథనాలు వస్తున్నాయి. పాండ్యాను విడిచిపెట్టేందుకు గుజరాత్‌ అంగీకరించిందని కూడా తెలుస్తోంది. ఐపీఎల్‌ ఫ్రాంఛైజీలు ఆటగాళ్లను పరస్పరం మార్చుకునే ట్రేడింగ్‌ విండో ఆదివారంతో ముగియనుంది.

గుంభనంగానే ఫ్రాంచైజీలు..

హార్దిక్ ముంబై ఇండియన్స్‌ కు వెళ్తున్నట్లు పెద్దఎత్తున ఊహాగానాలు వస్తున్నా.. అటు ముంబై కానీ, ఇటు గుజరాత్ కానీ.. స్పందించడం లేదు. ఆటగాళ్లను మార్చుకోవడానికి ఫ్రాంఛైజీలకు ఆదివారం వరకు గడువున్నందున.. మరొక్క రోజు ఆగాల్సిందే. అయితే, హార్దిక్ కు తిరిగి ముంబైకి రావడంపై చర్చలు జరిగాయని.. అతడు ఫ్రాంచైజీ మారతాడని.. ఒప్పందం పూర్తి కావాల్సి ఉందని టైటాన్స్ వర్గాలు చెబుతున్నాయి. ట్రేడింగ్ లో భాగంగానే ఈ రెండు జట్లూ ఆటగాళ్లను మార్చుకోనున్నాయి.

ముంబై ఎవరిని ఇస్తుందో?

హార్దిక్ పాండ్యా వంటి ఆటగాడిని తీసుకుంటున్న ముంబై.. బదులుగా గుజరాత్ కు ఎవరిని ఇస్తుందో అనే దానిపై ఎలాంటి సమాచారం లేదు. ఇక్కడ మరో విషయం ఏమంటే.. హార్దిక్‌ ముంబైకి తిరిగొస్తే ప్రస్తుతానికి రోహిత్ శర్మ సారథ్యంలోనే ఆడాలి. టీమిండియా, ఇటు లీగ్ లో గతంలోనూ అతడు రోహిత్ కెప్టెన్సీ లో ఆడాడు. ఇదేమీ సమస్య కాకున్నా.. రోహిత్ కెరీర్ ముగియనున్నందున పాండ్యాను కెప్టెన్ చేస్తారనే ఊహాగానాలు వస్తున్నాయి. పాండ్యాకు రూ.15 కోట్లు ఇచ్చి ముంబై వెనక్కు తీసుకుంటున్నట్లగా తెలుస్తోంది.

గుజరాత్ కెప్టెన్ గా గిల్?

గుజరాత్ టైటాన్స్ కెప్టెన్ గా యువ ఓపెనర్ శుబ్ మన్ గిల్ ఎంపికవుతాడనే కథనాలు వస్తున్నాయి. వాస్తవానికి గిల్ కెప్టెన్సీ కోసం మరో ఫ్రాంచైజీకి వెళ్తాడని గతంలో వినిపించింది. హార్దిక్ ఎలాగూ ముంబైకి వెళ్తున్నందున గిల్ కే కెప్టెన్సీ దక్కే చాన్సుంది.