మహేష్ ఫ్యాన్స్.. గెట్ రెడీ అమ్మా

దాదాపు పది రోజుల నుంచి టాలీవుడ్ లో ఎక్కడ చూసినా ‘సర్దార్ గబ్బర్ సింగ్’ గురించే చర్చ. ఏప్రిల్ 8న ఈ చిత్రం విడుదల కాబోతున్న నేపథ్యంలో వరుసబెట్టి మేకింగ్ వీడియో.. టీజర్.. ట్రైలర్ లతో మోత మోగించేసింది సర్దార్ టీమ్. పవన్ సినిమా సందడి కొంచెం తగ్గగానే తర్వాతి సమ్మర్ మూవీ ‘సరైనోడు’ హంగామా మొదలవుతుంది. ఏప్రిల్ 1న నేరుగా మార్కెట్ లోకి వచ్చేయబోతున్నాయి ‘సరైనోడు’ పాటలు. ఆ తర్వాత ట్రైలర్ వదలడానికి ప్లాన్ చేస్తున్నారు. ఇక సమ్మర్ లో రాబోయే నెక్స్ట్ బిగ్ మూవీ ‘బ్రహ్మోత్సవం’ మాత్రం ప్రస్తుతం చర్చల్లో లేదు.  ‘బ్రహ్మోత్సవం’ను నిర్మిస్తున్న పీవీపీ సంస్థ ప్రస్తుతం తన ఫోకస్ అంతా ‘ఊపిరి’ మీదే పెట్టింది. ఈ సినిమా రిలీజై.. దాని సందడి తగ్గాక ‘బ్రహ్మోత్సవం’ పబ్లిసిటీని ఓ రేంజిలో చేయడానికి ప్రణాళికలు రచించింది పీవీపీ సంస్థ.

ఇంగ్లిష్ న్యూ ఇయర్ తొలి రోజున ‘బ్రహ్మోత్సవం’ ఫస్ట్ టీజర్ రిలీజ్ చేసిన బ్రహ్మోత్సవం టీమ్.. సెకండ్ టీజర్ కు సైతం కొత్త సంవత్సరాదినే ఎంచుకుంది. ఐతే అది తెలుగు సంవత్సరాది కావడం విశేషం. ఏప్రిల్ 8న ఉగాది సందర్భంగా బ్రహ్మోత్సవం కొత్త టీజర్ రిలీజ్ చేయబోతున్నట్లు తెలిసింది. ‘బ్రహ్మోత్సవం’ ఫస్ట్ టీజర్ విషయంలో భిన్నాభిప్రాయాలు వ్యక్తమయ్యాయి. ఆ టీజర్ లో వినిపించిన పాటను మిక్కీ ఎక్కడో కాపీ కొట్టాడన్న ఆరోపణలొచ్చాయి. టీజర్ కూడా స్పెషల్ గా ఏమీ అనిపించలేదు. పాటలోని కొన్ని విజువల్స్ తీసి మొక్కుబడిగా టీజర్ వదిలేశారు. ఐతే ఈసారి మాత్రం ఓ కాన్సెప్ట్ ప్రకారం టీజర్ కట్ చేస్తున్నారట. మహేష్ కొత్త లుక్ పరిచయం చేస్తూ.. కొన్ని డైలాగులు కూడా యాడ్ చేస్తున్నారట. కాబట్టి ప్రిన్స్ ఫ్యాన్స్ పండగ చేసుకోవడానికి రెడీ అయిపోవాలన్నమాట.