'హౌస్ అరెస్ట్' ఫస్ట్ లుక్: అందరినీ మెప్పించే పిల్లల వినోదం..!

ఇటీవల కాలంలో తెలుగులో పిల్లలను ఆకట్టుకునే సినిమాలు పెద్దగా రాలేదనే చెప్పాలి. హాలీవుడ్ నుంచి డబ్బింగ్ అయ్యే సూపర్ హీరోల సినిమాలు తప్ప తెలుగులో పిల్లలను మెప్పించే చిత్రాలు రాలేదు. ఈ నేపథ్యంలో పిల్లలను ఆకట్టుకునేలా రూపొందిస్తున్న వినోదాత్మక చిత్రం ''హౌస్ అరెస్ట్''. '90ఎంఎల్' దర్శకుడు శేఖర్ రెడ్డి ఎర్ర ఈ చిత్రాన్ని తెరకెక్కిస్తున్నాడు. శ్రీమతి చైతన్య సమర్పణలో ప్రైమ్ షో ఎంటర్టైన్మెంట్ బ్యానర్ పై కె. నిరంజన్ రెడ్డి ఈ చిత్రాన్ని నిర్మిస్తున్నాడు. 'మా పిల్లలతో నవ్వించడానికి వస్తున్నాం.. మీ పిల్లలతో రెడీగా ఉండండి' అంటూ తాజాగా 'హౌస్ అరెస్ట్' చిత్రానికి సంబంధించిన ఫస్ట్ లుక్ మరియు మోషన్ పోస్టర్ ని చిత్ర యూనిట్ విడుదల చేసింది.

'హౌస్ అరెస్ట్' ఫస్ట్ లుక్ మోషన్ పోస్టర్ ఆసక్తికరంగా ఉంది. ఇంట్లోకి ప్రవేశించిన దుండగుల బ్యాచ్ ని అయిదుగురు చిచ్చర పిడుగుల గ్యాంగ్.. గొలుసులతో కట్టి ముప్పు తిప్పలు పెడుతున్నట్లు కనిపిస్తోంది. అసలు ఈ రెండు గ్యాంగుల మధ్య ఈ పరిస్థితి ఎందుకు వచ్చింది.. సూపర్ కిడ్స్ వాళ్ళని గొలుసులు కట్టి మరీ ఆడించేలా ఏమి జరిగిందనేది తెలియాలంటే సినిమా విడుదలయ్యే వరకు ఆగాల్సిందే. ఈ చిత్రానికి అనూప్ రూబెన్స్ సంగీతం సమకూరుస్తున్నారు. యువరాజ్ సినిమాటోగ్రాఫర్ గా వర్క్ చేస్తుండగా.. చోటా కె.ప్రసాద్ ఎడిటింగ్ చేస్తున్నాడు. ఈ చిత్రంలో హాస్యనటలు శ్రీనివాస్ రెడ్డి - సప్తగిరి - అల్లరి రవిబాబు - రఘు - రవి ప్రకాష్ - తాగుబోతు రమేష్ - సునయన - కౌశిక్ ప్రధాన పాత్రలు పోషిస్తున్నారు. స్టార్లను కాకుండా కేవలం ఆర్టిస్టులను నమ్ముకుని చేసిన హోల్ ఫ్యామిలీ ఎంటర్ టైనర్ 'హౌస్ అరెస్ట్' త్వరలోనే ప్రేక్షకుల ముందుకు రానుంది.