2017 జనవరి 25న ఒక అద్భుతమే చూడబోతున్నామేమో అనిపిస్తోంది. హృతిక్ రోషన్-యామీ గౌతమ్ జంటా రూపొందిన ‘కాబిల్’ సినిమా ఇండియన్ స్క్రీన్ మీద కొత్త చరిత్ర సృష్టిస్తుందేమో అనిపిస్తోంది. హృతిక్ లాంటి స్టార్ హీరో అంధుడి పాత్ర పోషించడమే అరుదైన విషయం అయితే.. హీరోయిన్ యామి కూడా ఇందులో అంధురాలే. అంధుల మధ్య స్టోరీలో కిక్ ఏం ఉంటుంది అనుకున్న వారికి దీని ట్రైలరే సమాధానంగా నిలిచింది. ఆహ్లాదకరంగా.. ఉత్కంఠ రేపేలా సినిమా ఉండబోతోందని ఆ ట్రైలర్ హింట్ ఇచ్చింది. సినిమాపై అంచనాల్ని పెంచింది.
ఇప్పుడు తాజాగా ఈ సినిమాలోని ‘కాబిల్ హూ..’ అనే పాటను లాంచ్ చేసింది చిత్ర బృందం. అది చూస్తే.. అంధుల మధ్య కూడా రొమాన్స్ ఇంత అందంగా.. అద్భుతంగా ఆవిష్కరించొచ్చా అన్న ఫీలింగ్ కలుగుతోంది. హృతిక్.. యామి ఇద్దరూ కూడా అద్భుతమైన రీతిలో అభినయించి ఈ పాటను రక్తి కట్టించారు. అందులోనూ హృతిక్.. యామికి ప్రపోజ్ చేసే దృశ్యం వావ్ అనిపిస్తోంది. ఈ పాటలో దర్శకుడి విజన్.. కెమెరా పనితనం.. సంగీత దర్శకుడి ప్రతిభ.. అన్నీ కనిపిస్తున్నాయి. ఈ పాట చూశాక సినిమాపై మీద మరింత మంచి ఇంప్రెషన్ కలగడం ఖాయం. జనవరి 25న షారుఖ్ ఖాన్ సినిమా ‘రాయీస్’ పోటీకి వస్తోందని హృతిక్ అభిమానులు కొంచెం టెన్షన్ పడుతున్నారు కానీ.. ఈ పాటు చూశాక నిజానికి షారుఖ్ ఫ్యాన్సే కంగారు పడాలేమో. హృతిక్ తండ్రి రాకేష్ రోషన్ నిర్మించిన ‘కాబిల్’కు సంజయ్ గుప్తా దర్శకత్వం వహించాడు.