క‌మ‌ల్ క‌ల‌ల సినిమా క‌దులుతోంది

మరుదనాయగం.. దాదాపు రెండు దశాబ్దాల కిందట విశ్వనాయకుడు కమల్ హాసన్ స్వీయ దర్శకత్వంలో, నిర్మాణంలో మొదలుపెట్టిన సినిమా ఇది. బ్రిటిష్ రాణి ఎలిజబెత్ ఈ సినిమా ప్రారంభోత్సవానికి హాజరవడం.. కమల్ కేవలం ట్రైలర్ షూట్ చేయ‌డానికే 9 కోట్ల రూపాయలు ఖర్చు పెట్టడం.. అప్ప‌ట్లోనే బ‌డ్జెట్ రూ.100 కోట్ల‌ని ప్ర‌క‌టించడం అప్పట్లో పెద్ద సంచలనం.

ఐతే ఎంతో ఆర్భాటంగా మొదలైన ఈ సినిమా.. అనుకోకుండా ఆగిపోయింది. దాదాపు 30 శాతం షూటింగ్ అయ్యాక సినిమాను ఆపేశాడు క‌మ‌ల్‌. ఆ త‌ర్వాత సినిమాను మ‌ళ్లీ మొదలు పెడ‌తా అంటూనే ఉన్నాడు కానీ.. అలా చూస్తుండ‌గానే రెండు ద‌శౄబ్దాలు గ‌డిచిపోయాయి. అప్ప‌ట్లో ఈ సినిమాకు సంబంధించిన కొన్ని విజువల్స్ కూడా బయటికి వచ్చాయి. జనాల్ని అబ్బ‌రు ప‌రిచాయి. దీంతో ఈ సినిమా ఎప్ప‌టికైనా బ‌య‌టికి వ‌స్తుంద‌న్న ఆశ‌తో ఉన్నారు క‌మ‌ల్ అభిమానులు. ఐతే ఎట్ట‌కేల‌కు ‘మరుదనాయగం’ పునఃప్రారంభ‌మ‌య్యే అవ‌కాశాలు క‌నిపిస్తున్నాయి.

ప్ర‌స్తుతం ర‌జినీకాంత్-శంక‌ర్ ల ప్రెస్టీజియ‌స్ మూవీ 2.0ను ప్రొడ్యూస్ చేస్తున్న లైకా ప్రొడ‌క్ష‌న్స్ క‌మ‌ల్ క‌ల‌ల సినిమాను టేక‌ప్ చేసే అవకాశాలు క‌నిపిస్తున్నాయి. లండ‌న్లో ఉండే వ్యాపారవేత్త అయిన క‌మ‌ల్ ఫ్రెండు ఒక‌రు ఈ ప్రాజెక్టులో భాగ‌స్వామి అవుతున్నాడ‌ట‌. ఇటీవ‌లే లండ‌న్లో త‌న ఫ్రెండుతో క‌లిసి క‌మ‌ల్.. లైకా అధినేత సుభాస్క‌ర‌న్ తో స‌మావేశం  నిర్వ‌హించాడు. సినిమా ఏ ద‌శ‌లో ఉన్న‌ది.. మిగ‌తా పూర్తి చేయ‌డానికి ఎంత ఖ‌ర్చ‌య్యేది ప్రెజెంటేష‌న్ ఇచ్చాడ‌ట క‌మ‌ల్. త్వ‌ర‌లోనే ఈ ప్రాజెక్టు మ‌ళ్లీ సెట్స్ మీదికి వెళ్లే అవ‌కాశాలున్నాయంటున్నారు. చూద్దాం ఏం జ‌రుగుతుందో?


Like Us on Facebook : https://www.facebook.com/Tupakidotcom/