మిస్టర్ కూడా ఎక్కడా తగ్గట్లేదుగా..

వరుణ్ తేజ్ హీరోగా శ్రీను వైట్ల దర్శకత్వంలో రూపొందిన మూవీ మిస్టర్. ఆగడు.. బ్రూస్ లీ చిత్రాలతో వరుసగా ఫ్లాపులు మూటకట్టుకున్న వైట్ల.. ఎంతో ప్రతిష్టాత్మకంగా చేపట్టి మిస్టర్ ను తెరకెక్కించాడు. ప్రస్తుతం షూటింగ్ ఫినిష్ చేసుకుంటున్న ఈ మూవీ.. అదే సమయంలో పోస్ట్ ప్రొడక్షన్ పనులు కూడా చేసుకుంటోంది.

ఇప్పుడీ చిత్రానికి రిలీజ్ డేట్ నిర్ణయించింది యూనిట్. ఏప్రిల్ 14న మిస్టర్ ను థియేటర్లలోకి తేవాలని డిసైడ్ చేశారు. ఏప్రిల్ 7న వెంకటేష్ గురు.. మణిరత్నం చెలియాలు రిలీజ్ అవుతుండగా.. ఆ తర్వాతి వారమే వరుణ్ తేజ్ మిస్టర్ ను షెడ్యూల్ చేశారు. ఏప్రిల్ 28న బాహుబలి ది కంక్లూజన్ రిలీజ్ అవుతుండడంతో.. రెండు వారాల సమయం చూసుకుని మిస్టర్ ను తెరపైకి తెచ్చేస్తున్నారు. బాహుబలిపై ఉన్న అంచనాల కారణంగా.. మూడో వారంలో వేరే సినిమా ఏదీ షెడ్యూల్ కాకపోవచ్చు. సో.. సినిమా బాగుంటే రెండు వారాల పాటు థియేటర్లలో సందడి చేసే అవకాశం మిస్టర్ కు లభించనుంది.

టైట్ షెడ్యూల్ ని ఫిక్స్ చేసుకుని వస్తున్నా.. మూవీపై కాన్ఫిడెంట్ గా ఉన్నారు యూనిట్. కొన్ని వారాల క్రితం రిలీజ్ చేసిన మిస్టర్ టీజర్ కు మంచి స్పందనే వచ్చింది. ఈ మధ్య కామెడీ కలగలిసిన మాస్ సినిమాలు తీస్తున్న వైట్ల.. మళ్లీ చాలా సంవత్సరాల తర్వాత ఓ క్యూట్ రొమాంటిక్ మూవీని తెరకెక్కిస్తుండడం విశేషం.

Like Us on Facebook : https://www.facebook.com/Tupakidotcom/