ఒక్క సినిమాతో ఆలోచన మారింది

ఆంగ్రీ యంగ్ మ్యాన్ గా పేరున్న రాజశేఖర్ గత కొన్నేళ్లుగా ఫాంలో లేక ఇబ్బంది పడుతున్న తరుణంలో ప్రవీణ్ సత్తారు దర్శకత్వంలో వచ్చిన గరుడవేగా మంచి ఫలితాన్ని ఇచ్చింది. ఓవర్ ది బోర్డ్ బడ్జెట్ కనక వెళ్లకపోయి ఉంటే నిర్మాతకు మంచి లాభ సాటి వెంచర్ గా ఇది మిగిలేది కాని ఈ పదేళ్ళలో రాజశేఖర్ చేసిన బెస్ట్ మూవీ ఇదేనని నిస్సందేహంగా చెప్పొచ్చు. ఆ మధ్య తనకు ఏ మాత్రం నప్పని కథలను ఎంచుకుని పొరపాట్లు చేసి దానికి తగ్గ మూల్యమే చెల్లించిన రాజశేఖర్ కొత్త సినిమాల విషయంలో ఆచి తూచి అడుగులు వేస్తున్నట్టు కనిపిస్తోంది. అ!! లాంటి విభిన్నమైన సినిమాను టాలీవుడ్ కు పరిచయం చేసిన దర్శకుడు ప్రశాంత్ వర్మతో రాజశేఖర్ ఒక సినిమా చేయబోతున్నాడు అనే వార్త ఇప్పుడు ఫిలిం నగర్ లో హాట్ టాపిక్ గా మారింది.

అ!! తర్వాత ప్రశాంత్ వర్మకు అవకాశాలు వెల్లువలా వచ్చాయి. కాని తొందరపడి కమిట్ కాకుండా తన దగ్గరనున్న కథలకు సూట్ అయ్యే హీరోలను మాత్రమే ఎంచుకుంటాను అని చెప్పిన ప్రశాంత్ వర్మకు ఆ కథానాయకుడు రాజశేఖర్ లో కనిపించాడట. షూటింగ్ ఎప్పుడు మొదలవుతుంది తదితర వివరాలు తెలియలేదు కాని దీనితో పాటు మరో కాన్సెప్ట్ బేస్డ్ మూవీ కూడా రాజశేఖర్ ఓకే చేసినట్టు తెలిసింది. కాకపోతే దానికి దర్శకుడు ఎవరు అనేది మాత్రం ప్రస్తుతానికి సస్పెన్స్ . ఆ మధ్య రామ్ గోపాల్ వర్మతో పట్టపగలు అనే సినిమా చేసాడు రాజశేఖర్. దాని టీజర్ కూడా మూడేళ్ళ క్రితమే రిలీజ్ చేసారు. కాని సినిమా విడుదల మాత్రం ఆగిపోయింది. ఇకపై వస్తుందా రాదా అనేది కూడా అనుమానమే.రాజశేఖర్ మొదటి సారి ఒక హారర్ మూవీలో చూడొచ్చు అనుకున్న అభిమానుల ఆశలు గల్లంతయ్యాయి. ఆ వర్మ సంగతి ఏమో కాని ప్రశాంత్ వర్మతో హిట్ కొట్టాలని బలంగా కోరుకుంటున్నారు ఫ్యాన్స్