'వకీల్ సాబ్' లో మార్పుల చేర్పుల క్రెడిట్ మొత్తం అతనికే దక్కుతుందా..?

పవర్ స్టార్ పవన్ కళ్యాణ్ నటించిన తాజా చిత్రం 'వకీల్ సాబ్' టీజర్ సంక్రాంతి సందర్భంగా విడుదలైన సంగతి తెలిసిందే. ఈ యాక్షన్‌ ప్యాక్డ్‌ టీజర్‌ ఫ్యాన్స్ ని విశేషంగా ఆకట్టుకుంటోంది. ఇందులో లాయర్ గా నటిస్తున్న పవన్‌ గెటప్ మరియు ఆహార్యం అభిమానులతో పాటు మాస్‌ ప్రేక్షకులను కూడా ఆకట్టుకుంటోంది. బోనీ క‌పూర్ స‌మ‌ర్ప‌ణ‌లో శ్రీ వెంక‌టేశ్వ‌ర క్రియేష‌న్స్‌ - బే వ్యూ ప్రాజెక్ట్స్ ప‌తాకాల‌పై దిల్‌ రాజు - శిరీష్ ఈ చిత్రాన్ని నిర్మించారు. వేణు శ్రీరామ్ దర్శకత్వం వహించారు. ఇది 'పింక్' చిత్రానికి తెలుగు రీమేక్. అయితే ఈ టీజర్ చూసిన తర్వాత పవర్ స్టార్ ని దృష్టిలో పెట్టుకుని దర్శకుడు వేణు శ్రీరామ్ మాతృకలో భారీ మార్పులు చేసినట్లు అర్థం అవుతోంది.

వాస్తవానికి పవన్ కళ్యాణ్ రీ ఎంట్రీ ఇస్తున్నాడని ఫ్యాన్స్ ఖుషీ అయినప్పటికీ.. ఇందుకు 'పింక్' రీమేక్ ని ఎంచుకున్నందుకు కాస్త నిరాశకు గురయ్యారు. ఎందుకంటే ఈ సినిమా మహిళలపై జరిగే లైంగిక వేధింపుల నేపథ్యంలో సాగే కోర్ట్ డ్రామా. అందులోనూ హీరో కంటే ముగ్గురు అమ్మాయిల ప్రాధాన్యత ఉంటుంది. దీంతో ఫ్యాన్స్ ని తృప్తి పరిచే అంశాలు ఉండకపోవచ్చని అందరూ అనుకున్నారు. అయితే 'వకీల్ సాబ్' టీజర్ చూసిన తర్వాత వారందరూ హ్యాపీగా ఉన్నారని తెలుస్తోంది.

 కోర్ట్ డ్రామా అనుకున్న సినిమాని ఫైట్ సీక్వెన్స్ లతో యాక్షన్ మూవీ అనుకునే రేంజ్ లో చూపించారు. అలానే ఇందులో లవ్ ట్రాక్ యాడ్ చేయడంతో పాటుగా పవన్ ని మూడు వేరియేషన్స్ లో చూపించబోతున్నారు. అయితే 'వకీల్ సాబ్'లో చేసిన ఈ మార్పుక6క్రెడిట్ మాత్రం దర్శకుడు వేణు శ్రీరామ్ కే దక్కుతుందని చెప్పవచ్చు. స్టార్ హీరోని డైరెక్ట్ చేసే అవకాశం అందిపుచ్చుకున్న వేణు.. దాన్ని పూర్తి స్థాయిలో వినియోగించుకున్నాడు. మరి ఈ సినిమా డైరెక్టర్ గా అతనికి మరిన్ని అవకాశాలు తెచ్చిపెడుతుందేమో చూడాలి.