విశాల్ దెబ్బ‌కు CBFCలో పెను మార్పులు?
ఇక‌పై ప్రాంతీయ చిత్రాల హిందీ అనువాదాల విడుదలకు సెన్సార్‌షిప్ సర్టిఫికేట్‌లను పొందే ప్రక్రియలో కేంద్ర ప్రభుత్వం గణనీయమైన మార్పులను అమల్లోకి తేనుంద‌ని తెలిసింది.
నటుడిగానే కాకుండా తమిళ సినీ నిర్మాతల మండలి అధ్యక్షుడిగా, నడిగర్ సంఘం కార్యదర్శిగా కూడా విశాల్ కి పేరు, గుర్తింపు ఉన్నాయి. అత‌డి దూకుడు ప్ర‌తిసారీ చ‌ర్చ‌కు వ‌స్తూనే ఉంది. తమిళ సినిమా రంగాన్ని సంస్కరించే దిశగా అత‌డు చురుగ్గానే పనిచేస్తున్నారు. ఇటీవల 'మార్క్ ఆంటోని' విడుదలైన తరువాత, కేంద్ర సెన్సార్ ధృవీకరణ ప్రక్రియలో లంచం చెల్లించాల్సి వ‌చ్చింద‌ని ముంబై సెంట్రల్ బోర్డ్ ఆఫ్ ఫిల్మ్ సర్టిఫికేషన్ (CBFC) పై విశాల్ తీవ్రంగా ఆరోపించాడు.
'మార్క్ ఆంటోనీ' హిందీ విడుదల కోసం ముంబై సిబిఎఫ్‌సికి సినిమాని ప్ర‌ద‌ర్శించ‌గా, అధికారులు సర్టిఫికేషన్ కోసం లంచాలు డిమాండ్ చేసార‌ని ఆరోపించాడు. ఈ అనైతిక పద్ధతిని తీవ్రంగా వ్యతిరేకిస్తూ.. విశాల్ లంచానికి సంబంధించిన సాక్ష్యాలను సమర్పించి, వీడియో ప్రకటన ద్వారా భారత ప్రధాని న‌రేంద్ర మోదీ, మహారాష్ట్ర ముఖ్యమంత్రికి కూడా విజ్ఞప్తి చేశారు. విశాల్ ఫిర్యాదుపై స్పందించిన ప్రభుత్వం సంబంధిత అధికారులను సస్పెండ్ చేసింది. ప్రస్తుతం ముంబై సిబిసిఐడి కేసు దర్యాప్తు చేస్తోంది.
అయితే అంత‌టితో అయిపోయిందా? అంటే.. ఇప్పుడు అస‌లైన ప్ర‌యోజ‌న‌క‌ర‌మైన అప్ డేట్ అందింది. ఇక‌పై ప్రాంతీయ చిత్రాల హిందీ అనువాదాల విడుదలకు సెన్సార్‌షిప్ సర్టిఫికేట్‌లను పొందే ప్రక్రియలో కేంద్ర ప్రభుత్వం గణనీయమైన మార్పులను అమల్లోకి తేనుంద‌ని తెలిసింది. గతంలో హిందీలో విడుదల చేయాలనుకునే తమిళ చిత్రాలకు కేవలం ముంబై నుంచి సెన్సార్ సర్టిఫికెట్లు పొందాల్సి వచ్చేది. ఇప్పుడు తమిళ సినిమాల హిందీ సెన్సార్‌షిప్‌ను చెన్నై (తమిళనాడు)లోనే నిర్వహించవచ్చని ప్రభుత్వం ప్రకటించింది. దీని వల్ల తమిళ చిత్ర నిర్మాతలు ముంబైకి వెళ్లి ధృవీకరణ కోసం CBFCతో లాబీయింగులు చేయాల్సిన అవసరం ఉండదు.
తమిళనాడు CBFC ఇప్పటికే తెలుగు, మలయాళం, కన్నడ చిత్రాలకు సర్టిఫికేట్ లు ఇవ్వడం గమనార్హం. ఈ పద్ధతి ఇప్పుడు తమిళ చిత్రాల హిందీ విడుదలలకు కూడా విస్తరించింది. ముంబై CBFC అధికారులకు వ్యతిరేకంగా ధైర్యంగా మాట్లాడినందుకు విశాల్ ప్రశంసలకు అర్హుడు. ఇది తమిళ చిత్ర నిర్మాతలకు ప్రయోజనం కలిగించే సానుకూల మార్పులకు దారితీసింది. ఇది కేవలం త‌మిళం వ‌ర‌కే ప‌రిమితం కాదు.. తెలుగు సినిమాలు, క‌న్న‌డం, మలయాళం స‌హా ఇత‌ర ప‌రిశ్ర‌మ‌ల‌కు కూడా వ‌ర్తిస్తుంద‌ని తెలిసింది. ఇక‌పై ప్రాంతీయ సినిమాల హిందీ అనువాదాల సెన్సార్ కోసం ముంబైకి వెళ్లాల్సిన ప‌ని లేదు. చెన్నైలో తమిళ సినిమాల‌కు, హైద‌రాబాద్‌లో తెలుగు అనువాదాల‌కు సెన్సార్ ప‌ని పూర్త‌వుతుంది. బెంగ‌ళూరులో కన్నడ ఇండ‌స్ట్రీ కోసం సీబీఎఫ్ సి ఏర్పాటు ఉంటుంది. ఏది ఏమైనా విశాల్ డేరింగ్ స్టెప్ కి ఇప్పుడు తెలుగు నిర్మాతలు స‌హా అంద‌రూ కృత‌జ్ఞ‌త‌లు తెలియ‌జేయాలి.