2024లో బిగ్ స్క్రీన్ మీద కనిపించని హీరోయిన్లు వీరే!

ఏటా తమ అందచందాలతో సినీ ప్రియులను అలరించే పలువురు హీరోయిన్లు.. 2024లో బిగ్ స్క్రీన్ మీద కనిపించలేదు. చేతి నిండా ప్రాజెక్ట్స్ తో ఏడాది పొడవునా బిజీగా ఉన్నప్పటికీ, అనుకున్న విధంగా సినిమాలు విడుదల అవ్వకపోవడంతో ఈ సంవత్సరం సందడి చేయలేకపోయారు. అయితే ఈసారి తెరపై కనిపించకపోయినా, 2025లో మాత్రం అస్సలు తగ్గేదేలే అంటున్నారు. కొత్త ఏడాదిలో అలరించడానికి రెడీ అవుతున్న ఆ హీరోయిన్లు ఎవరో ఇప్పుడు చూద్దాం.

గతేడాది చివర్లో 'మిస్ శెట్టి మిస్టర్ పోలిశెట్టి' సినిమాతో హిట్టు కొట్టిన సౌత్ క్వీన్ అనుష్క శెట్టి.. ఈ ఏడాది 'ఘాటీ' మూవీతో ప్రేక్షకుల ముందుకు రావడానికి ప్రయత్నించింది. కానీ కుదరలేదు. క్రిష్ దర్శకత్వంలో తెరకెక్కుతున్న ఈ యాక్షన్ డ్రామా వచ్చే సమ్మర్ లో థియేటర్లలోకి రానుంది. ఇప్పటికే సైలెంట్ గా షూటింగ్ పూర్తి చేసుకున్న ఈ సినిమా పోస్ట్ ప్రొడక్షన్ కార్యక్రమాలు జరుగుతున్నాయి. మరోవైపు స్వీటీ మలయాళ డెబ్యూ మూవీ 'కథనార్: ది వైల్డ్ సోర్సెరర్' కూడా రిలీజ్ కు రెడీ అవుతోంది.

2023లో 'శాకుంతలం', 'ఖుషి' సినిమాలతో సందడి చేసిన అగ్ర కథానాయిక సమంత రూత్ ప్రభు.. ఈ ఇయర్ లో బిగ్ స్క్రీన్ మీద కనిపించలేదు. కాకపోతే ఇటీవల 'సిటాడెల్: హనీబన్నీ' అనే వెబ్ సిరీస్ తో ఓటీటీలో అలరించింది. ఆ మధ్య తన సొంత ప్రొడక్షన్ లో 'మా ఇంటి బంగారం' అనే సినిమాని ప్రకటించింది. ఆ తర్వాత దీనికి సంబంధించిన ఎలాంటి అప్డేట్ బయటకు రాలేదు. కానీ ఈ మూవీ వచ్చే సంవత్సరం విడుదల అవుతుందని అభిమానులు భావిస్తున్నారు.

'వాల్తేరు వీరయ్య', 'వీర సింహా రెడ్డి', 'సలార్ పార్ట్-1' వంటి మూడు బ్లాక్ బస్టర్ హిట్లు అందుకున్న శృతి హాసన్.. ఈ ఏడాది సైలెంట్ అయిపోయింది. కానీ నెక్స్ట్ ఇయర్ మాత్రం 'కూలీ' సినిమాతో ఆడియన్స్ ముందుకు రాబోతోంది. 'సలార్ 2' కూడా లైనప్ లో ఉంది కానీ, అది ఎప్పుడు సెట్స్ మీదకు వెళ్తుందనేది తెలియడం లేదు. గ్యాప్ లేకుండా సినిమాలు చేసే నయనతారకు కూడా ఈ ఇయర్ లో గ్యాప్ వచ్చింది. కానీ వచ్చే ఏడాది మాత్రం దాదాపు 8 ప్రాజెక్ట్స్ తో రాబోతోంది. కాకపోతే వీటిల్లో ఒక్కటంటే ఒక్క తెలుగు సినిమా లేదు.

అందాల భామ నిధి అగర్వాల్ తెలుగు తెరపై కనిపించి మూడేళ్లు దాటింది. ఇప్పుడు 'హరి హర వీరమల్లు', 'ది రాజాసాబ్' వంటి రెండు పాన్ ఇండియా సినిమాల మీద బోలెడన్ని ఆశలు పెట్టుకుంది. ఇవి రెండూ వచ్చే వేసవిలో విడుదల కాబోతున్నాయి. 'ఎఫ్ 3'లో స్పెషల్ సాంగ్ లో మెరిసిన బుట్టబొమ్మ పూజా హెగ్డే.. తెలుగు సినిమా చేసి రెండేళ్లు దాటిపోయింది. ఈ ఏడాది ఆమె నటించిన సినిమా లేకుండానే గడిచిపోయింది. అయితే ప్రస్తుతం అమ్మడు 'సూర్య 44', 'దలపతి 69', 'దేవా'తో సహా నాలుగు చిత్రాలు చేస్తోంది.

'భోళా శంకర్' తర్వాత తెలుగు తెరకు దూరమైన మిల్కీ బ్యూటీ తమన్నా.. వచ్చే ఏడాది 'ఓదెల 2' చిత్రంతో పలకరించనుంది. రెండేళ్ల క్రితం ఆడియన్స్ కు 'థ్యాంక్యూ' చెప్పిన రాశీ ఖన్నా.. సమ్మర్ లో 'తెలుసు కదా' అంటూ రాబోతోంది. దీంతో పాటుగా ఆమె చేతిలో రెండు తమిళ, హిందీ చిత్రాలు ఉన్నాయి. 'ది గోట్' స్పెషల్ సాంగ్ లో తళుక్కున మెరిసిన త్రిష కృష్ణన్.. నెక్స్ట్ ఇయర్ హాఫ్ డజన్ సినిమాతో రానుంది. వాటిల్లో 'విశ్వంభర' లాంటి తెలుగు ప్రాజెక్ట్ కూడా ఉంది. ఇలా అనేక మంది ముద్దుగుమ్మలు 2025లో సందడి చేయడానికి సిద్ధమవుతున్నారు. మరి వీరిలో ఎవరెవరికి విజయాలు వరిస్తాయో చూడాలి.