'పుష్ప-2' బెనిఫిట్ షోల రగడ!

టాలీవుడ్ నెక్స్ట్ బిగ్ రిలీజ్ 'పుష్ప-2' ఇంకో ఐదు రోజుల్లో ప్రేక్షకుల ముందుకు రాబోతోంది. ఈ సినిమాపై దేశవ్యాప్తంగా ఏ స్థాయిలో అంచనాలు ఉన్నాయో తెలిసిందే. ఇలాంటి పెద్ద సినిమా వస్తుంటే.. తెలుగు రాష్ట్రాల్లో భారీ స్థాయిలో బెనిఫిట్ షోలు పడడం మామూలే. ఏపీలో జగన్ సర్కారు ఉన్నన్ని రోజులు బెనిఫిట్ షోలకు అవకాశం లేదు. తెలంగాణలో కూడా ఒక దశలో అర్ధరాత్రి షోలను నిషేధించారు. కానీ కొన్ని నెలలుగా అక్కడా ఇక్కడా ఈ స్పెషల్ షోలు పడుతున్నాయి.

ఈ ఏడాది ఆరంభంలో తెలంగాణలో 'గుంటూరు కారం' చిత్రానికి బెనిఫిట్ షోలు పడగా.. తర్వాత కల్కి, దేవర చిత్రానికి రెండు చోట్లా స్పెషల్ షోలు వేశారు. ఈ కోవలోనే 'పుష్ప-2'కు కూడా మిడ్ నైట్ షోలు ఉంటాయని అభిమానులు ఆశిస్తున్నారు. ఐతే ఈ బెనిఫిట్ షోల డీల్స్ కొంచెం భిన్నంగా ఉంటాయి. డిస్ట్రిబ్యూటర్ల నుంచి అభిమాన సంఘాల వాళ్లు షోలను హోల్ సేల్‌గా కొనేసి.. వాళ్లే షోలు వేసుకుంటారు. దాని వల్ల డిస్ట్రిబ్యూటర్లకూ ఇబ్బంది ఉండదు. అభిమాన సంఘాల వాళ్లూ సంతోషిస్తారు.

కానీ 'పుష్ప-2' విషయంలో మాత్రం బెనిఫిట్ షోల విషయంలో ఇబ్బందులు తలెత్తుతున్నట్లు తెలుస్తోంది. గతంలో బన్నీ సినిమాలను మెగా ఫ్యాన్స్ ఓన్ చేసుకునేవాళ్లు. బెనిఫిట్ షోలను చాలా వరకు వాళ్లే తీసుకునేవారు. కానీ ఇప్పుడు పరిస్థితులు మారిపోయాయి. మెగా అభిమానుల నుంచి బన్నీ అభిమానులు వేరైపోయారు. వారికి కొత్త ఫ్యాన్స్ తోడయ్యారు. బన్నీ తీరు నచ్చక అతణ్ని మెగా ఫ్యాన్స్ బాయ్‌కాట్ చేసే పరిస్థితి వచ్చింది. 'పుష్ప-2' సినిమాను బాయ్‌కాట్ చేయాలని సోషల్ మీడియాలో ట్రెండ్ కూడా చేశారు.

ఐతే రిలీజ్ టైంకి ఇదంతా పక్కకు వెళ్లి మెగా ఫ్యాన్స్ సినిమాను ఓన్ చేసుకుంటారని భావించారు. కానీ వాళ్లు బాయ్‌కాట్ పిలుపు విషయంలో చాలా సీరియస్‌గా ఉన్నట్లు కనిపిస్తోంది. ఏపీ, తెలంగాణల్లో ఎక్కడా మెగా ఫ్యాన్స్ బెనిఫిట్ షోలు తీసుకోవద్దని.. చూడొద్దని చాలా బలంగా నిర్ణయించుకున్నారు. దీంతో బన్నీ ఎక్స్‌క్లూజివ్ ఫ్యాన్సే వీటిని డీల్ చేయాల్సి వస్తోంది. వారికి ఈ విషయంలో అనుభవం తక్కువ. మెగా ఫ్యాన్స్ సహకారం లేకుండా వీటిని మేనేజ్ చేయడం అంత తేలిక కాదు. దీంతో ఈ షోలు అనుకున్న సంఖ్యలో పడకపోవచ్చని.. రెస్పాన్స్ కూడా ఆశించిన స్థాయిలో ఉండదని అంచనా వేస్తున్నారు.