మెగాస్టార్ తో మైనస్.. ఇప్పుడు మరో దెబ్బ!

టాలీవుడ్ యంగ్ డైరెక్టర్ వెంకీ కుడుముల గురించి అందరికీ తెలిసిందే. అసిస్టెంట్ డైరెక్టర్ గా కెరీర్ స్టార్ట్ చేసిన ఆయన.. అ అ, జాదూగాడు, తూఫాన్ వంటి పలు చిత్రాలకు వర్క్ చేశారు. ఆ తర్వాత ఛలో మూవీతో డైరెక్టర్ గా ఇండస్ట్రీలోకి ఎంట్రీ ఇచ్చారు. నాగశౌర్య హీరోగా నటించిన ఆ మూవీతో మంచి హిట్ అందుకున్నారు.

ఆ తర్వాత రెండో మూవీ భీష్మ.. నితిన్ తో చేసిన సంగతి విదితమే. 2020లో రిలీజ్ అయిన ఆ సినిమాతోనూ హిట్ కొట్టేశారు. అలా ఛలో, భీష్మతో వరుస హిట్స్ అందుకున్న వెంకీ.. మెగాస్టార్ చిరంజీవితో మూవీ చేసే గోల్డెన్ ఛాన్స్ సాధించారు. 2021 డిసెంబర్ లో ఆ సినిమా అనౌన్స్మెంట్ కూడా వచ్చింది. దీంతో అంతా ఒక్కసారి షాకయ్యారు.

మూడో సినిమానే చిరుతో చేసే ఛాన్స్ అందుకున్నారు అంటే.. మామూలు విషయం కాదని అంతా డిస్కస్ చేసుకున్నారు. కానీ ఆ ప్రాజెక్ట్ కార్యరూపం దాల్చలేదు. ఎందుకంటే ముందు స్టోరీ లైన్ ను బాగా నచ్చిన చిరు.. తర్వాత స్క్రిప్ట్ విని గ్రీన్ సిగ్నల్ ఇవ్వలేదు. మరో స్టోరీ రాసుకుని వస్తే తప్పకుండా మూవీ చేద్దామని అన్నారు.

ఆ విషయాన్ని రీసెంట్ గా వెంకీ కూడా ఓ ఇంటర్వ్యూలో చెప్పారు. చిరుతో మూవీ వేరే లెవెల్ లో ఉండాలని ఫిక్స్ అయ్యానని, కానీ కుదరకపోవడం వల్ల చాలా బాధపడ్డానని తెలిపారు. అయితే మెగాస్టార్ తో మూవీ పక్కన పెడితే.. నితిన్ తో వెంకీ మరో మూవీకి కమిట్ అయ్యారు. నితిన్, శ్రీలీల జంటగా రాబిన్ హుడ్ మూవీని తెరకెక్కించారు.

కచ్చితంగా రాబిన్ హుడ్ మూవీ హిట్ అవుతుందని అంతా ఎక్స్పెక్ట్ చేశారు. కానీ ఆ సినిమా.. ఆడియన్స్ ను మెప్పించలేకపోయింది. నితిన్ ఖాతాలో మరో ఫ్లాప్ చేరింది. వెంకీ కుడుములకు హ్యాట్రిక్ మిస్ అయింది. పెద్ద హిట్ కొడతాననుకున్న ఆయన ఆశలకు గండి పడింది. కెరీర్ లోనే బెస్ట్ మూవీ అవుతుందనుకుంటే రివర్స్ అయింది.

2020లో భీష్మ వస్తే.. 2025లో రాబిన్ హుడ్ రిలీజైంది. ఐదేళ్ల గ్యాప్ తర్వాత కొత్త మూవీ తీసిన వెంకీ డిజాస్టర్ అందుకున్నారు. దీంతో ఇప్పుడు సోషల్ మీడియాలో కొత్త చర్చ మొదలైంది. అప్పుడు చిరంజీవితో మూవీ చేసే ఛాన్స్ పోయింది.. ఇప్పుడు ఐదేళ్ల తర్వాత తీసిన రాబిన్ హుడ్ ఫ్లాప్ గా మారిందని కామెంట్లు పెడుతున్నారు.

చిరంజీవితో మూవీపై ఫోకస్ చేసి ఉన్నా.. బాగుండేదని అభిప్రాయపడుతున్నారు. నిజానికి మెగాస్టార్ ఇప్పుడు ఫుల్ బిజీగా ఉన్నారు. వరుసగా యంగ్ డైరెక్టర్స్ తో క్రేజీ అండ్ భారీ మూవీస్ ఓకే చేస్తున్నారు. మరి వెంకీ కుడుముల ఇప్పుడు ఏం చేస్తారో.. మెగాస్టార్ ను మళ్లీ కొత్త కథతో కలుస్తారో లేదో.. కొత్త సినిమా ఎవరితో తీస్తారో చూడాలి.