అమెరికాలో రోడ్డు ప్రమాదం... తెలంగాణ కాంగ్రెస్ యువజన నాయకుడు మృతి!

అమెరికాలో జరిగిన రోడ్డు ప్రమాదాల్లో మరణించిన తెలుగు వారి జాబితాలో మరో నెంబర్ పెరిగింది. తీవ్ర ఆందోళన రెకెత్తిస్తోన్న ఈ ఘటనల్లో తాజాగా మరొకటి చేరింది. బుధవారం తెల్లవారుజామున అమెరికాలో జరిగిన రోడ్డు ప్రమాదంలో హైదరాబాద్ కు చెందిన మహమ్మద్ వాజిద్ (28) మృతి చెందాడు. ఈయన కాంగ్రెస్ పార్టీకి చెందిన యువజన నాయకుడు కావడం గమనార్హం.

అవును...ఖైరతాబాద్ లోని మక్తా ప్రాంతానికి చెందిన మహమ్మద్ వాజిద్.. నాలుగేళ్ల క్రితం చదువుల కోసం అమెరికా వెళ్లాడు. అక్కడ పార్ట్ టైమ్ జాబ్ చేస్తూ విద్యాభ్యాసాన్ని కొనసాగించాడు. మరోపక్క.. వాజిద్ విద్యార్థి దశ నుంచి రాజకీయాల్లో చురుగ్గా పాల్గొనేవాడు. ఈ క్రమంలో ఖైరతాబాద్ డివిజన్ లో కాంగ్రెస్ పార్టీ యువజన నాయకుడిగా సేవలందించాడు.

అనంతరం.. ఎన్నారై కాంగ్రెస్ మైనారిటీ విభాగంలో కీలక పాత్ర పోషిస్తూ.. ప్రవాస భారతీయుల సమస్యలను పరిష్కరించేందుకు కృషి చేసేవాడని చెబుతున్నారు. అలా అటు చదువుకుంటూ, పార్ట్ టైమ్ జాబ్ చేసుకుంటూ.. ఇటు రాజకీయాల్లోనూ యాక్టివ్ గా ఉండేవారు మహమ్మద్ వాజిద్. ఈ క్రమంలో అమెరికాలో జరిగిన రోడ్డు ప్రమాదంలో మృతిచెందారు.

భారత కాలమానం ప్రకారం.. బుధవారం తెల్లవారుజామున అమెరికాలోని చికాగో నుంచి 500 కి.మీ. దూరంలో ఉన్న టాంగో వెళ్లి, తిరుగు ప్రయాణంలో ఉండగా ఓ భారీ ట్రక్కును ఇతడు ప్రయాణిస్తున్న కారుతో ఢీకొనడంతో మృతి చెందినట్లు తెలుస్తోంది. పొగమంచు కారణంగా.. స్టాప్ బోర్డు కనిపించి ఉండకపోవచ్చని అంటున్నారు. ఈ ప్రమదంలో వాజిద్ అక్కడికక్కడే మృతి చెందాడు.