రాజశేఖర్ కు హిట్.. బాలయ్య ఫ్యాన్స్ సంబరం

తెలుగు సినీ పరిశ్రమలో ఒక స్టార్ హీరో సినిమాకు వ్యతిరేకంగా ఇంకో స్టార్ హీరో అభిమానులు పని చేయడం మామూలే. కానీ ఒక స్టార్ హీరో సినిమా ఆడాలని.. ఇంకో స్టార్ హీరో అభిమానులు తమ వంతు ప్రయత్నం చేసే సందర్భాలు కూడా అప్పుడప్పడూ జరుగుతుంటాయి. ఇవి ఆయా హీరోల మధ్య స్నేహాన్ని బట్టి ఉంటుంది. నితిన్ సినిమా వచ్చిందంటే పవన్ కళ్యాణ్ అభిమానులు ఎలా సపోర్ట్ చేస్తారో తెలిసిందే. పవన్ మీద నితిన్ చూపించే అభిమానమే అందుక్కారణం. ఇప్పుడు నందమూరి బాలకృష్ణ అభిమానులు.. రాజశేఖర్ సినిమా ‘గరుడవేగ’కు అలాగే సపోర్ట్ చేస్తుండటం విశేషం. బాలయ్యకు రాజశేఖర్ అభిమాని అని కాదు కానీ.. ‘గరుడవేగ’ విషయంలో వీళ్లిద్దరి బంధం బాలయ్య అభిమానుల్ని ఈ దిశగా పురిగొలుపుతోంది.

‘గరుడవేగ’ సినిమాకు ముహూర్తం చూసిందే బాలయ్య. అంతే కాదు.. ఈ సినిమా ఆడియో వేడుకకు కూడా వచ్చి ప్రమోషన్ కు తనవంతుగా సాయం చేశాడు బాలయ్య. ఆ సందర్భంగా బాలయ్య గురించి రాజశేఖర్.. రాజశేఖర్ గురించి బాలయ్య చాలా పాజిటివ్ గా మాట్లాడారు. దీని వల్ల బాలయ్య అభిమానుల్లో రాజశేఖర్ మీద పాజిటివ్ ఒపీనియన్ వచ్చింది. పైగా దశాబ్దం పాటు హిట్టు లేక సతమతమయ్యాడన్న సానుభూతి కూడా ఆయన మీద ఉంది. దీంతో ‘గరుడవేగ’ సినిమా గురించి బాలయ్య ఫ్యాన్స్ పాజిటివ్ గా ప్రచారం చేశారు. ఈ సినిమాకు పాజిటివ్ టాక్ రాగా.. దాన్ని మరింత విస్తృతం చేసే బాధ్యత బాలయ్య ఫ్యాన్స్ తీసుకోవడం విశేషం. సోషల్ మీడియాలో ఈ సినిమా గురించి బాలయ్య అభిమానులు సానుకూల ప్రచారం గట్టిగానే చేస్తున్నారు. బాలయ్య ముహూర్తం పెట్టాడు.. బాలయ్య ఆడియో రిలీజ్ చేశాడు.. కాబట్టి ఈ సినిమా హిట్టయిందంటూ ఆయన అభిమానులు ట్వీట్లు పెడుతుండటం విశేషం. ఏదేమైనా రాజశేఖర్ కు ఈ రకమైన తోడ్పాటు అందడం ఆశ్చర్యమే.