'కేజీఎఫ్' దర్శకుడికి ప్రభాస్ - ఎన్టీఆర్ బర్త్ డే విషెస్..!

‘ఉగ్రం’ సినిమాతో బ్లాక్ బస్టర్ అందుకున్న కన్నడ దర్శకుడు ప్రశాంత్ నీల్.. 'కేజీఎఫ్' సినిమాతో దేశ వ్యాప్తంగా గుర్తింపు తెచ్చుకున్నాడు. కన్నడ సినిమా ఖ్యాతిని పాన్ ఇండియా స్థాయికి తీసుకెళ్లిన ప్రశాంత్.. ఇప్పుడు టాలీవుడ్ హీరోలకు ప్రేక్షకులకు ఫేవరేట్ డైరెక్టర్ గా మారిపోయాడు. 'కేజీఎఫ్ చాప్టర్ 2' చిత్రాన్ని రిలీజ్ కి రెడీ చేసిన టాలెంటెడ్ డైరెక్టర్.. ఫోకస్ మొత్తం ఇప్పుడు టాలీవుడ్ హీరోల మీదే పెట్టినట్లు కనిపిస్తోంది. ఎందుకంటే ఇప్పటికే ప్రభాస్‌ - ఎన్టీఆర్‌ లతో ప్రాజెక్ట్స్ కమిట్ అవడమే కాకుండా.. మహేష్ బాబు - అల్లు అర్జున్ లతో చర్చలు జరుపుతున్నారని తెలుస్తోంది.

టాలీవుడ్ మోస్ట్ వాంటెడ్ డైరెక్టర్ గా మారిన ప్రశాంత్ నీల్ నేడు పుట్టినరోజును జరుపుకుంటున్నారు. ఈ నేపథ్యంలో సోషల్ మీడియా వేదికగా సినీ ప్రముఖులు అభిమానులు ఆయనకు శుభాకాంక్షలు తెలియజేస్తున్నారు. ప్రస్తుతం ఆయనతో పని చేస్తున్న ప్రభాస్ - తారక్ కూడా బర్త్ డే విషెస్ అందించారు. 'హ్యాపీ బర్త్ డే ప్రశాంత్ నీల్' అంటూ ప్రభాస్ ఫేస్ బుక్ - ఇన్స్టాగ్రామ్ లలో పోస్ట్ చేశారు. ''పుట్టినరోజు ప్రశాంత్. ఎల్లప్పుడూ అద్భుతంగా ఉండండి. ఫోర్స్ లో జాయిన్ అవడానికి ఆతృతగా ఎదురుచూస్తున్నాను!'' అని ఎన్టీఆర్ ట్వీట్ చేశారు.

కాగా, యంగ్ రెబల్ స్టార్ ప్రభాస్ - ప్రశాంత్ నీల్ కాంబినేషన్లో ''సలార్'' అనే పాన్ ఇండియా మూవీ తెరకెక్కుతున్న సంగతి తెలిసిందే. హోంబలే ఫిలింస్ బ్యానర్ పై విజయ్‌ కిరగందూర్‌ ఈ చిత్రాన్ని నిర్మిస్తున్నాడు. ప్రస్తుతం షూటింగ్ జరుపుకుంటున్న ఈ భారీ యాక్షన్ ఎంటర్టైనర్ 2022 ఏప్రిల్ 23న ప్రేక్షకుల ముందుకు రానుంది. అలానే యంగ్ టైగర్ ఎన్టీఆర్ తో ఓ సినిమాని అనౌన్స్ చేశారు ప్రశాంత్. ఎన్టీఆర్ ఆర్ట్స్ - మైత్రీ మూవీ మేకర్స్ సంస్థలు కలిసి ఈ చిత్రాన్ని నిర్మించనున్నాయి. పప్రస్తుతం వీరిద్దరూ కమిటైన ప్రాజెక్ట్స్ కంప్లీట్ అయిన వెంటనే '#NTR31' సెట్స్ పైకి వెళ్ళనుంది.