సైరాను సిద్ధం చేస్తున్నారా?

మెగాస్టార్ చిరంజీవి హీరోగా రూపొందుతున్న సైరా ఎట్టకేలకు ఒక కొలిక్కి వస్తున్నట్టు సమాచారం. మొన్న కోకాపేటలో కీలకమైన్స్ సెట్ లో అగ్ని ప్రమాదం జరిగినప్పటికీ అందులో తీయాల్సిన భాగం మొత్తం పూర్తయ్యిందని టాక్. బాలన్స్ ఉన్న కొన్ని సన్నివేశాలు ఎలా తీయాలా అనే దాని గురించి ప్రస్తుతం చర్చలు జరుగుతున్నాయి. ఇదిలా ఉంచితే రామ్ చరణ్ గతంలో చెప్పిన దసరా రిలీజ్ సాధ్యపడేలా విశ్వప్రయత్నం చేస్తున్నట్టు తెలిసింది.

ఆఘమేఘాల మీద పనులను పరిగెత్తిస్తే తప్ప ఆ డేట్ అందుకోలేరు. చిరు ఆరోగ్యం దృష్ట్యా ఆయన మీద అధిక ఒత్తిడి లేకుండా నిర్మాత రామ్ చరణ్ దర్శకుడు సురేందర్ రెడ్డి అన్ని రకాల జాగ్రత్తలు తీసుకుంటున్నారు. ఇతర కారణాలు చాలా ఉన్నప్పటికీ సైరా అనుకున్న దానికన్నా ఎక్కువ జాప్యం జరగటానికి ఇది కూడా ఒక రీజనే.

సో దసరాకు ఖచ్చితంగా రావాలి అంటే దానికి బెస్ట్ డేట్ గా అక్టోబర్ 2 అనుకుంటున్నట్టు తాజా అప్ డేట్. ఆ రోజు గాంధీ జయంతి. అక్కడి నుంచి సెలవులు ప్రారంభం అవుతాయి. ఎంతలేదన్నా రెండు వారాలు దొరికే ఛాన్స్ ఉంటుంది. సైరాకు పాజిటివ్ టాక్ వస్తే వసూళ్ల ఊచకోతకు ఆకాశమే హద్దవుతుంది. బాహుబలి తర్వాత ఆ కెపాసిటీ ఉన్న మూవీగా ఒక్క సైరా మీదే ట్రేడ్ ఎన్నో అంచనాలు పెట్టుకుని పెట్టుబడులకు సిద్ధపడుతోంది.

అన్ని సవ్యంగా కుదిరి సైరా కనక అక్టోబర్ 2నే వస్తే మెగా ఫ్యాన్స్ కు అంతకన్నా కావాల్సింది ఏముంటుంది. పొరపాటున ఆ డేట్ కనక మారి సైరా సంక్రాంతికి వెళ్లే పరిస్థితి వస్తే మాత్రం అప్పటికే షెడ్యూల్ చేసుకున్న చాలా సినిమాల ప్లానింగ్ గందరగోళంలో పడుతుంది. చూడాలి సైరా కథ ఇంకెన్ని మలుపులు తిరుగుతుందో