నాని ఇంకో సినిమా మొదలెట్టేశాడు

నేచురల్ స్టార్ నాని స్పీడు మామూలుగా లేదిప్పుడు. గత ఏడాది ‘ఎవడే సుబ్రమణ్యం’తో చాన్నాళ్ల తర్వాత ఓ సక్సెస్ ఖాతాలో వేసుకున్న నాని.. అప్పట్నుంచి కనీసం ఐదారు నెలలకు ఓ రిలీజ్ ఉండేలా ప్లాన్ చేసుకుంటున్నాడు. పైగా అతడి ప్రతి సినిమా బాగానే ఆడుతోంది. ‘భలే భలే మగాడివోయ్’ బ్లాక్‌ బస్టర్ హిట్టయితే.. కృష్ణగాడి వీర ప్రేమగాథ.. జెంటిల్ మన్ కూడా మంచి ఫలితాన్నే అందుకున్నాయి. ‘జెంటిల్ మన్’ పూర్తయ్యే సమయానికే విరించి వర్మ దర్శకత్వంలో ‘మజ్ను’ సినిమాను లైన్లో పెట్టేసిన నాని.. ఆ చిత్రాన్ని మూడు నెలల్లోనే పూర్తి చేసేస్తున్నాడు. సెప్టెంబర్లోనే ఈ చిత్రం ప్రేక్షకుల ముందుకొచ్చేస్తోంది. ఈ సినిమా సెట్స్ మీద ఉండగానే నాని ఇంకో సినిమాకు శ్రీకారం చుట్టేశాడు.

దిల్ రాజు నిర్మాణంలో త్రినాథరావు నక్కిన దర్శకత్వంలో నాని చేయబోయే ‘నేను లోకల్’ ఈ రోజే ప్రారంభోత్సవం జరుపుకుంది. రెగ్యులర్ షూటింగ్ త్వరలోనే ఆరంభం కానుంది. ‘మజ్ను’ పూర్తి చేసి దీని మీదికి ఫోకస్ షిఫ్ట్ చేయనున్నాడు నాని. ఇందులో నాని సరసన కీర్తి సురేష్ కథానాయికగా నటించనుంది. క్రేజీ కాంబినేషన్లో క్యాచీ టైటిల్‌ తో వస్తున్న ఈ సినిమా మీద ఇప్పటికే ఆసక్తి నెలకొంది. గత ఏడాది త్రినాథరావు తీసిన ‘సినిమా చూపిస్త మావ’ ప్రివ్యూ చూసి ఆ సినిమాలో విషయం ఉందని గ్రహించిన దిల్ రాజు.. ఆ చిత్రాన్నే తనే రిలీజ్ చేసి మంచి ఫలితాన్నందుకున్నాడు. ఇప్పుడు అతడి దర్శకత్వంలోనే సినిమా మొదలుపెట్టేశాడు. టాలెంట్ ఉన్నోడికి వెంటనే అడ్వాన్స్ ఇచ్చేసి తన బేనర్లో సినిమా చేసేయడం రాజుకు అలవాటు. ఇంతకుముందు ‘పటాస్’ సినిమాను కూడా తనే రిలీజ్ చేశాడు. అనిల్ రావిపూడికి తన బేనర్లో ఛాన్సిచ్చాడు.