'క‌ప‌ట‌ధారి' థీమ్ ట్రైలర్: మర్డర్ మిస్టరీని చేధించే ట్రాఫిక్ పోలీస్..!

అక్కినేని హీరో సుమంత్‌ నటించిన లేటెస్ట్ క్రైమ్ థ్రిల్లర్ "క‌ప‌ట‌ధారి". ప్రదీప్ కృష్ణమూర్తి దర్శకత్వం వహించిన ఈ చిత్రాన్ని క్రియేటివ్ ఎంటర్టైనర్స్ మరియు బొఫ్తా మీడియా బ్యానర్‌ పై ధనుంజయన్ నిర్మించాడు. ఇది కన్నడ హిట్ 'కావలధారి' సినిమాకు రీమేక్. ఇప్పటికే 'క‌ప‌ట‌ధారి' చిత్రానికి సంబంధించిన ఫస్ట్ లుక్ - టీజర్ - ట్రైలర్ సినిమాపై ఆసక్తిని కలిగించాయి. ఫిబ్రవరి 19న ఈ చిత్రాన్ని ప్రేక్షకుల ముందుకు రానున్న నేపథ్యంలో చిత్ర యూనిట్ తాజాగా 'క‌ప‌ట‌ధారి' థీమ్ ట్రైలర్ ని విడుదల చేశారు.

థీమ్ ట్రైలర్ చూస్తుంటే మర్డర్ మిస్టరీని చేధించే ట్రాఫిక్ పోలీస్ ఆఫీసర్ కథే ఈ చిత్రం అని తెలుస్తోంది. ట్రాఫిక్ పోలీస్ అయిన సుమంత్ ఈ కేసుని ఇన్వెస్టిగేట్ చేస్తున్న క్రమంలో ఎలాంటి సమస్యలు ఎదుర్కొన్నాడు? వాటిని ఎలా పరిష్కరించాడు? అనే అంశాలతో ఈ సినిమా రూపొందింది. 'క్రైమ్ అయినా ట్రాఫిక్ అయినా పోలీస్ పోలీసే..' అంటూ ఈ థీమ్ ట్రైలర్ సినిమా నేపథ్యాన్ని వెల్లడిస్తోంది. దీనికి మ్యూజిక్ డైరెక్టర్ సైమన్ కె.కింగ్ అందించిన బ్యాగ్రౌండ్ స్కోర్ అద్భుతంగా ఉంది.

ఈ చిత్రంలో నందిత శ్వేత హీరోయిన్ గా నటించగా.. నాజర్ - జయప్రకాష్ - సుమన్ రంగనాథ్ - వెన్నెల కిషోర్ - సంపత్ ఇతర ప్రధాన పాత్రల్లో కనిపిస్తున్నారు. ఈ చిత్రానికి ధ‌నుంజ‌య‌న్ స్క్రీన్‌ ప్లే అందించగా.. బాషాశ్రీ సంభాషణలు రాశారు. రసమతి సినిమాటోగ్రాఫర్ గా వ్యవహరించగా.. ప్ర‌వీణ్ కె.ఎల్ ఎడిటింగ్ వర్క్ చేసారు. "క‌ప‌ట‌ధారి'' సినిమా ఈ నెల 19న విడుదల కానుంది.