కోన తగ్గాడు.. అతనూ తగ్గిపోయాడు

కోన వెంకట్-గోపీ మోహన్.. ఈ రచయితల ద్వయానికి టాలీవుడ్లో ఒకప్పుడు ఎంతటి క్రేజ్ ఉండేదో ప్రత్యేకంగా చెప్పాల్సిన పని లేదు. టాలీవుడ్లో రచయితల పారితోషకాన్ని కోట్లలోకి తీసుకెళ్లింది వీళ్లిద్దరే అని చెప్పొచ్చు. శ్రీను వైట్ల కాంబినేషన్లోనే కాక వేరే దర్శకులతోనూ సూపర్ హిట్లిచ్చింది ఈ జోడీ. వెంకీ.. ఢీ.. దుబాయ్ శీను.. రెడీ.. కింగ్.. దూకుడు.. లౌక్యం లాంటి సూపర్ హిట్లున్నాయి ఈ జోడీ ఖాతాలో. ఐతే రెండేళ్లుగా వీళ్లిద్దరి పరిస్థితి ఏమంత బాగా లేదు. ఇద్దరి కాంబినేషన్లో వచ్చిన బ్రూస్ లీ.. డిక్టేటర్ నిరాశ పరిచాయి. వేర్వేరుగా చేసిన సినిమాలూ పెద్దగా ఆడలేదు. కోన వెంకట్ నెమ్మదిగా రైటింగ్ తగ్గించేసి ప్రొడక్షన్లోకి వెళ్లిపోయాడు. ఆయన పెన్ పవర్ బాగా తగ్గిపోయింది. అదే సమయంలో గోపీ మోహన్ కూడా డౌన్ అయ్యాడు.

కోన పీక్స్ లో ఉన్నంత కాలం గోపీ కూడా పీక్స్ లోనే ఉన్నాడు. ఆయన తగ్గాక ఈయనా తగ్గిపోయాడు. రైటింగ్ నుంచి డైరెక్షన్లోకి వెళ్తున్న చాలామందిలాగే గోపీ మోహన్ కూడా మెగా ఫోన్ పట్టాలని చాలా కాలంగా చూస్తున్నాడు. మధ్యలో సునీల్ హీరోగా సినిమా చేయడానికి ప్రయత్నాలు చేశాడు. కుదర్లేదు. చివరికి గత ఏడాది ‘ఇష్టంగా సంతోషంగా ఆనందంగా’ అంటూ దర్శకుడిగా తన తొలి సినిమాను అనౌన్స్ చేశాడు. కానీ తర్వాత అప్ డేట్స్ లేవు. మరోవైపు రచయితగానూ కొనసాగట్లేదు గోపీ. కోన వెలిగినంత కాలం గోపీ కూడా వెలిగాడు. ఇప్పుడు కోన ఫేడవుట్ అవగానే గోపీ పరిస్థితి కూడా అలాగే ఉంది. ఇక మళ్లీ వీళ్లిద్దరి కాంబినేషన్లో సినిమా రావడం కూడా సందేహంగానే ఉంది. ఈ నేపథ్యంలో గోపీ భవిష్యత్ అడుగులు ఎలా ఉంటాయో చూడాలి.

Like Us on Facebook : https://www.facebook.com/Tupakidotcom/