మహానటి టీంతో బాహుబలి??

తెలుగు ప్రేక్షకుల గుండెల్లో చిరస్థాయిగా నిలిచి ఉండే గొప్పనటి సావిత్రి. ఆమె జీవిత కథకు వెండితెర రూపమిస్తూ డైరెక్టర్ నాగ్ అశ్విన్ తెరకెక్కించిన మహానటి సినిమా అన్ని వర్గాల ప్రేక్షకులను ఆకట్టుకుంది. సావిత్రిగా కీర్తి సురేష్ నటన.. డైరెక్టర్ నాగ్ అశ్విన్ ప్రతిభ కలగలసి మహానటికి అద్భుతమైన రూపమిచ్చింది. ఈ సినిమా కలెక్షన్లే కాదు.. పెద్ద హీరోల ప్రశంసలను బాగానే దక్కించుకుంది.

మహానటి ప్రొడ్యూసర్ అశ్వినీదత్ చాలాకాలంగా సినిమాలకు తీయడం లేదు. కానీ మహానటి సబ్జెక్టుపై ఉన్న నమ్మకంతో ఆయన కూతుళ్లు స్వప్నదత్.. ప్రియాంక దత్ లు ఈ సినిమా నిర్మించారు. తన అల్లుడు - డైరెక్టర్ నాగ్ అశ్విన్ సాధించిన విజయంతో తిరిగి లైమ్ లైట్ లోకి వచ్చిన అశ్వినీ దత్ స్టార్ హీరోలతో సినిమా చేయాలని అశ్వనీదత్ ఆశపడుతున్నాడు. ఇందుకోసం బాహుబలి హీరో ప్రభాస్ ను కలిసి ఓ నాగ్ అశ్విన్ దగ్గరున్న స్టోరీ వినిపించాడట. స్టోరీ లైన్ నచ్చడంతో ప్రభాస్ సినిమా చేయడానికి ఓకే చెప్పాడని తెలుస్తోంది. దీంతో నాగ్ అశ్విన్ ఈ సినిమాకు సంబంధించి స్క్రిప్ట్ రెడీ చేస్తున్నాడు.

బాహుబలి తరవాత ఆకాశమంత రేంజ్ కు చేరిన ప్రభాస్ ఆచితూచి సెలక్టివ్ గా సినిమాలు చేస్తున్నాడు. అందుకే నాగ్ అశ్విన్ అతడిని ఇంప్రెస్ చేసే స్క్రిప్ట్ రెడీ చేసే పనిలో పడ్డాడు. ప్రస్తుతం ప్రభాస్ భారీ బడ్జెట్ తో తెరకెక్కుతున్న యాక్షన్ ఎంటర్ టెయినర్ సాహో చేస్తున్నాడు. దీని తరవాత జిల్ ఫేం రాధాకృష్ణ డైరెక్షన్ లో సినిమా చేయాల్సి ఉంది. వీటి తరవాత నాగ్ అశ్విన్ మూవీపై దృష్టి పెట్టే అవకాశముంది.