నూనూగు మీసాల వ‌య‌సున్న కుర్రాడి సినిమాతో ఎంట్రీ. అది హిట్ట‌యిందంటే కాస్త పేరున్న హీరోతో మ‌రో ఛాన్స్‌. అది కూడా హిట్ట‌యిందంటే యంగ్ గా ఉన్న స్టార్ హీరోల సినిమాల్లో ఆడిపాడ‌తారు. ఆ సినిమాలు కూడా హిట్ట‌వుతూ ఉంటే రెమ్యున‌రేష‌న్ పెంచుకొంటూ, రెండు మూడు ఇండ‌స్ట్రీల్లో పాగా వేస్తూ కొన్నాళ్ల‌పాటు హ‌ల్‌ చ‌ల్ చేస్తూ ప్రేక్ష‌కుల్ని అల‌రిస్తుంటారు. ఆ దూకుడు కొత్త అందాలొచ్చాక త‌గ్గిపోతుంటుంది. ఇక అప్పుడు మ‌రో దారిలేక సీనియ‌ర్ హీరోల స‌ర‌స‌న న‌టిస్తుంటారు. అలా ఒక్క‌సారి సీనియ‌ర్ హీరోల‌తో న‌టించాక ఇక మ‌ళ్లీ యంగ్ హీరోల‌తో క‌లిసి న‌టించ‌డం దాదాపుగా అరుదు. కానీ ఇలాంటి జ‌ర్నీకి పూర్తి భిన్నంగా క‌నిపిస్తుంటుంది న‌య‌న‌తార కెరీర్.
నయన్ మొట్ట‌మొద‌ట ర‌జ‌నీకాంత్‌ లాంటి సీనియ‌ర్ హీరో సినిమాతో ఎంట్రీ ఇచ్చేసింది. ఆ సినిమా సూప‌ర్‌ హిట్ కావ‌డం, న‌య‌న‌తార పాల‌బుగ్గ‌ల‌తో క‌నిపించ‌డంతో యంగ్ హీరోలు ఆఫ‌ర్ల మీద ఆఫ‌ర్లు ఇచ్చేశారు. అటు యంగ్ హీరోల‌తోనూ, ఇటు సీనియ‌ర్ల‌తోనూ న‌టిస్తూ ఎప్ప‌టిక‌ప్పుడు త‌న క్రేజ్‌ ని పెంచుకొంటూ వ‌చ్చేసింది. జ‌ర్నీ మొద‌లెట్టి ప‌దేళ్ల‌యినా స‌రే... ఇప్ప‌టికీ కుర్ర‌హీరోల ప‌క్క‌న ఆఫ‌ర్లు అందుకొంటూ అంద‌రినీ ఆశ్చ‌ర్య‌ప‌రుస్తోంది న‌య‌న‌తార. తోటి హీరోయిన్ల‌కు కూడా న‌య‌న‌తార కెరీర్ ని చూస్తూ ఆశ్చ‌ర్యపోతున్నారు. తాజాగా నానుం రౌడీ దాన్ సినిమాలో విజయ్ సేతుప‌తి స‌ర‌స‌న న‌టించింది న‌య‌న‌తార. ఇటీవ‌లే ఆ ట్రైల‌ర్‌ ని విడుద‌ల చేశారు. అందులో నయన్ కనిపిస్తున్న విధానం విస్మ‌యానికి గురిచేస్తోంది. ఎంత నాజూగ్గా క‌నిపిస్తోందంటే నిన్న మొన్న‌నే తెర‌పైకొచ్చిందేమో అన్నట్టుగా క‌నిపిస్తోంది. ఆ చిత్ర దర్శ‌కుడు విఘ్నేష్ శివన్ తో ప్రేమ‌లో ప‌డిన ఎఫెక్టో ఏంటో తెలియ‌దు కానీ... విజయ్ తో కెమిస్ట్రీ కూడా బాగా పండించిన‌ట్టు అనిపిస్తోంది. మొత్త‌మ్మీద విఘ్నేష్ శివన్ త‌న ల‌వ్‌ని తెర‌పై మ‌రింత తాజాగా చూపించేసి ఇంకా న‌య‌న్‌కి బోలెడంత కెరీర్ ఉంద‌న్న సంకేతాల్ని ప‌రిశ్ర‌మ‌కి ఇప్పించాడు.