పూరీకి నితిన్ థ్యాంక్స్ చెప్పాల్సిందే

నిజం చెప్పాలంటే ‘హార్ట్ అటాక్’కు ముందు పూరి జగన్నాథ్‌ తో పోలిస్తే నితిన్ బెటర్ పొజిషన్లో ఉన్నాడు. అప్పటికి పూరి కెమెరామన్ గంగతో రాంబాబు, ఇద్దరమ్మాయిలతో.. లాంటి ఫ్లాపులతో వెనకబడిపోయి ఉన్నాడు. కానీ నితిన్ మాత్రం ఇష్క్, గుండె జారి గల్లంతయ్యిందే లాంటి సూపర్ హిట్లతో జోరు మీద ఉన్నాడు. అలాంటి సమయంలో పూరి సినిమా చేద్దామంటే ఆయన ట్రాక్ రికార్డు గురించి ఆలోచించకుండా.. డైరెక్టర్ గా పూరికి ఉన్న ఇమేజ్ ను దృష్టిలో ఉంచుకుని ‘హార్ట్ అటాక్’కు ఓకే చెప్పాడు నితిన్. ఆ సినిమా ఇద్దరికీ మంచి ఫలితాన్నే ఇచ్చింది. ముఖ్యంగా పూరిని ఈ సినిమా మళ్లీ సక్సెస్ ట్రాక్ ఎక్కించి.. మళ్లీ పెద్ద హీరోలు తన వైపు చూసేలా చేసింది. ఎన్టీఆర్‌ తో టెంపర్ చేయడానికి కూడా ‘హార్ట్ అటాక్’ ఒకరకంగా ఉపయోగపడింది.

ఐతే తాను కొంచెం ఇబ్బందికర పరిస్థితుల్లో ఉండగా తనతో సినిమా చేసి పరోక్షంగా సాయపడ్డ నితిన్‌ తో ఈ మధ్య పూరి ఓ సినిమా ఓకే చేసి.. దాన్ని నాగబాబు తనయుడు వరుణ్ తేజ్ కు మళ్లించిన సంగతి తెలిసిందే. ఈ ప్రాజెక్టు రద్దయిన సమయంలో అనుకోని కారణాల వల్ల సినిమా మెటీరియలైజ్ కావట్లేదని నితిన్ ట్వీట్ చేస్తే.. నితిన్ తో చేయాల్సిన సినిమానే వరుణ్ తో చేస్తున్నట్లు పూరి వ్యాఖ్యానించడాన్ని బట్టి ఇద్దరికీ ఎక్కడో తేడా వచ్చిందని అర్థమైంది. ఐతే పూరి సినిమా మిస్సయినా పెద్దగా ఫీలవకుండా ఇప్పుడు మరో టాప్ డైరెక్టర్ త్రివిక్రమ్ తో సినిమా ఓకే చేశాడు నితిన్. త్రివిక్రమ్, పూరి ఇద్దరూ స్టార్ డైరెక్టర్లే కానీ.. పూరి చిన్న సినిమాలు కూడా చేస్తుంటాడు కాబట్టి.. అతడి దర్శకత్వంలో ఎవరైనా నటించొచ్చు. కానీ పవన్, మహేష్, బన్నీ లాంటి పెద్ద స్టార్ల తో మాత్రమే సినిమాలు చేసే త్రివిక్రమ్ తో నితిన్ పని చేయబోతుండటం అదృష్టమే అని చెప్పాలి. ఈ అదృష్టం తన తలుపు తట్టడానికి కారణమైన పూరీకి నితిన్ థ్యాంక్స్ చెప్పాల్సిందే.