ఎన్టీఆర్ సరసన కూడా ఆమేనా?

జైలవకుశ సినిమాలో కెరీర్ లో తొలిసారి త్రిపాత్రాభినయం చేసి అభిమానులను విమర్శకులను  మెప్పించాడు యంగ్ టైగర్ ఎన్టీఆర్. జై పాత్రతో తన నటనలో సత్తా ఏపాటితో అందరికీ తెలియజేశాడు. మరోవైపు బిగ్ బాస్ ప్రోగ్రాం ద్వారా బుల్లితెరపైన అడుగు పెట్టి శభాష్ అనిపించుకున్నాడు. ఈ డబుల్ జోష్ తో తరవాత సినిమా మాటల మాంత్రికుడు త్రివిక్రమ్ శ్రీనివాస్ డైరెక్షన్ లో చేయడానికి రెడీ అయ్యాడు. వీళ్లిద్దరి కాంబినేషన్ లో తీసే ఈ సినిమాకు పవర్ స్టార్ పవన్ కళ్యాణ్ వచ్చి క్లాప్ కొట్టి వెళ్లాడు.

ఎన్టీఆర్ తో ఏ స్టోరీ తీయాలనే దానిపై త్రివిక్రమ్ కు ఓ క్లారిటీ ఉన్నా హీరోయిన్ ను మాత్రం ఇంకా ఫైనల్ చేయలేదు. దువ్వాడ జగన్నాథమ్ సినిమాతో తనలోని గ్లామర్ కంటెంట్ తో అందరినీ కట్టిపడేసిన కన్నడ ముద్దుగుమ్మ పూజా హెగ్డే ను ఈ అవకాశం వరించనుందని తెలుస్తోంది. ప్రస్తుతం టాప్ హీరోలతో వరసగా సినిమాలు చేస్తున్న అను ఇమ్మానుయేల్ పేరు ముందుగా వినిపించింది. ఒక టైంలో అయితే టాలీవుడ్ లో బ్రహ్మాండమైన పేరు తెచ్చుకుని బాలీవుడ్ కు పెట్టెబేడా సర్దుకుని వెళ్లిపోయిన ఇలియానా ను తీసుకుంటున్నారనే రూమర్ కూడా వచ్చింది. ఇప్పుడు పూజా హెగ్డే పేరే గట్టిగా వినిపిస్తోంది.

ప్రస్తుతం త్రివిక్రమ్ శ్రీనివాస్ పవన్ కళ్యాణ్ 25వ సినిమా అజ్ఞాతవాసి షూటింగ్ లో బిజీగా ఉన్నాడు. కీర్తి సురేష్ - అను ఇమ్మానుయేల్ ఇందులో హీరోయిన్లుగా నటిస్తున్నారు. ఈ సినిమాను సంక్రాంతి నాటికి ప్రేక్షకుల ముందుకు తీసుకురావాలని భావిస్తున్నారు. పవన్ తో చేస్తున్న చిత్రం పూర్తయ్యాక త్రివిక్రమ్ ఎన్టీఆర్ సినిమా రెగ్యులర్ షూటింగ్ ప్రారంభించనున్నాడు.