కుర్ర హీరో కొత్త సినిమా.. రైట్ రైట్‌

తూనీగ తూనీగ లాంటి ఫ్లాప్ సినిమాతో అరంగేట్రం చేసినా.. అంత‌కుముందు ఆ త‌రువాత‌, ల‌వ‌ర్స్ సినిమాల‌తో బాగానే నిల‌దొక్కుకున్న‌ట్లు క‌నిపించాడు సుమంత్ అశ్విన్‌. కానీ చ‌క్కిలిగింత‌ - కొలంబ‌స్ సినిమాలు అత‌ణ్ని మ‌ళ్లీ జీరో ద‌గ్గ‌రికి తీసుకొచ్చేశాయి. ఇప్పుడు క‌చ్చితంగా హిట్టు కొట్టి తీరాల్సిన ప‌రిస్థితి. ఈ ప‌రిస్థితుల్లో ఓ మ‌ల‌యాళం హిట్టు సినిమాను న‌మ్ముకున్నాడు సుమంత్‌. ఆ సినిమానే.. ఆర్డినరీ. మూడేళ్ల క్రితం మలయాళంలో సూపర్ హిట్టయిన మూవీ ‘ఆర్డినరీ’. కుంచుకో బోబన్ - బిజు మీనన్ ముఖ్య పాత్రలు పోషించారు. సుగీత్ అనే దర్శకుడు ఈ సినిమాను రూపొందించాడు

ఇదో వెరైటీ సినిమా. ఓ బస్ డ్రైవర్ - కండక్టర్ జీవితాలతో ముడిపడిన కథతో తెరకెక్కింది.  ఇందులో కండ‌క్ట‌ర్ గా సుమంత్ న‌టిస్తుంటే.. డ్రైవ‌ర్ పాత్ర‌ను విల‌న్ క్యారెక్ట‌ర్లు చేసే ప్ర‌భాక‌ర్ పోషిస్తుండ‌టం విశేషం. ఈ సినిమా ఫ‌స్ట్ లుక్ పోస్ట‌ర్ ను ఈ రోజే రిలీజ్ చేశారు. సైజ్ జీరో సినిమాకు ప్రకాష్ కోవెలమూడి దగ్గర అసిస్టెంటుగా పని చేసిన మంజు ఈ సినిమాతో దర్శకుడిగా పరిచయమవుతున్నాడు. ఫ‌స్ట్ లుక్ పోస్ట‌ర్ ప్లెజెంట్ గా అనిపిస్తోంది. సుమంత్ లుక్ కూడా బాగానే ఉంది. త్వ‌ర‌లోనే టీజ‌ర్ కూడా రిలీజ్ చేయ‌బోతున్నారు.