తారకరత్న.. రాజా మీరు కేక

హీరోగా కెరీర్ సాగకపోవడంతో ‘అమరావతి’ సినిమాతో విలన్ అవతారంలోకి మారాడు తారకరత్న. ఆ సినిమాకు మంచి పేరైతే వచ్చింది కానీ.. సక్సెస్ రాలేదు. ఆ తర్వాత ఈ ఏడాది ‘రాజా చెయ్యి వేస్తే’ సినిమాలోనూ మరోసారి విలన్ పాత్ర చేశాడు. అది కూడా నిరాశ పరిచింది. ఐతే విలన్ పాత్రలో తారకరత్న ఈసారి కూడా బాగానే ఆకట్టుకున్నాడు. దీంతో అతడికి ఇంకో విలన్ పాత్ర దక్కింది. తారకరత్న విలన్ పాత్ర పోషిస్తున్న కొత్త సినిమా పేరు.. ‘రాజా మీరు కేక’ కావడం విశేషం. ఈ చిత్రాన్ని సురేష్ ప్రొడక్షన్స్ లాంటి పెద్ద బేనర్ నిర్మించబోతున్నట్లు వార్తలొస్తున్నాయి. దర్శకుడెవరన్నది ఇంకా వెల్లడి కాలేదు.

‘ఇంటింటా అన్నమయ్య’ సినిమాతో హీరోగా అరంగేట్రం చేస్తున్న యలమంచిలి రేవంత్ ఈ చిత్రంలో కథానాయకుడిగా నటిస్తాడట. రేవంత్ తొలి సినిమా ఇంకా విడుదలకు నోచుకోలేదు. త్వరలోనే ఆ చిత్రాన్ని ప్రేక్షకుల ముందుకు తెచ్చే ప్రయత్నాలు జరుగుతున్నాయి. బాలీవుడ్లో పేరు తెచ్చుకున్న తెలుగమ్మాయి శోభిత ధూళిపాళ్ల ఈ చిత్రంలో కథానాయికగా నటించనున్నట్లు సమాచారం. హీరోగా చేసిన ప్రయత్నాలన్నీ వృథా కావడంతో విలన్ గా కంటిన్యూ అవడమే మేలని తారకరత్న ఫిక్సయినట్లున్నాడు. విలన్ గా కూడా సక్సెస్ రాకపోయినా.. పేరైనా వచ్చింది. ఈసారి పేరుతో పాటు విజయం కూడా దక్కితే అతను విలన్ పాత్రల్లోనే కంటిన్యూ అయిపోవచ్చు.

Like Us on Facebook : https://www.facebook.com/Tupakidotcom/