బిగ్ బాస్ లో గోవిందుడి సందడి

సినిమా రిజల్ట్ తేలినా బాక్స్ ఆఫీస్ దగ్గర ఏ చింతా లేకుండా వసూళ్ల వర్షం కురుస్తున్నా ప్రమోషన్ విషయంలో ప్రతి చిన్న అవకాశాన్ని ఫుల్ గా వాడుకుంటోంది గీత గోవిందం టీమ్. అందుకే ఎక్కడ చూసినా ఈ పేరే మారుమ్రోగిపోతోంది. ఈ రోజు రాత్రి టెలికాస్ట్ అవుతున్న బిగ్ బాస్ 2 ఎపిసోడ్ లో విజయ్ దేవరకొండ దర్శకుడు పరశురామ్ చేసిన సందడి హై లైట్ గా నిలవబోతోంది. ఇప్పటికే దీని తాలూకు ప్రోమోలు హల్చల్ చేస్తున్నాయి. నాని విజయ్ దేవరకొండ ఇద్దరూ కలిసి దీప్తి సునయనను  టీజ్ చేయటం ఆకర్షణగా నిలవబోతోంది. నాని - విజయ్ ల మధ్య ఫ్రెండ్ షిప్ ఇప్పటిది కాదు. ఎవడే సుబ్రహ్మణ్యంలో నాని కన్నా ఎక్కువ వెయిట్ ఉన్న రిషి పాత్రను విజయ్ దేవరకొండ పోషించాడు. దాని తర్వాత వచ్చిన హిట్స్ తోనే నాని రేంజ్ పెరిగింది. అప్పటి నుంచి ఇద్దరి మధ్య దోస్తీ సాగుతూనే ఉంది. కలిసి సినిమా చేసే ఛాన్స్ మళ్ళి రాలేదు కానీ ఇలా షోను షేర్ చేసుకునే వారధిగా గీత గోవిందం మిగిలింది.

ఇప్పటికే 40 కోట్ల దాకా గ్రాస్ తీసుకొచ్చి ఔరా అనిపించినా గీత గోవిందులు రేపు వచ్చే రిపోర్ట్స్ లో ఎలాంటి షాకింగ్ ఫిగర్స్ నమోదు చేసి ఉంటారో అనేది ఆసక్తికరంగా మారింది. ఇప్పుడు సక్సెస్ మీట్ యుసూఫ్ గూడలో జరుగుతోంది.దానికి  వెండితెర బిగ్ బాస్ చిరంజీవి అతిధిగా వస్తుండగా ఇక్కడ బుల్లితెర బిగ్ బాస్ లో గోవిందుడు గెస్ట్ గా మారాడు. కాకతాళీయంగా ఉంది కదూ. ఈ ఎపిసోడ్ కి అధిక టిఆర్పి ని ఆశిస్తున్నారు నిర్వాహకులు. ఇప్పటికే పదో వారంలో అడుగు పెట్టిన బిగ్ బాస్ 2 మరో నెల రోజులు అయ్యాక ముగియనుంది. అందుకే ఎంత వీలైతే అంత మసాలా జోడించి క్రేజ్ ని పీక్స్ కి తీసుకెళ్లే ప్రయత్నం చేయబోతున్నారు. మరి గీత కూడా ఇందులో ఉందా లేదా అనేది ప్రస్తుతానికి సస్పెన్స్. సర్ ప్రైజ్ ఏమైనా ప్లాన్ చేసారేమో రాత్రికి తేలిపోతుంది.