ఇప్పట్లో ఆ సీక్వెల్‌ లేనట్లే..!

వెంకటేష్‌, వరుణ్‌ తేజ్ హీరోలుగా తమన్నా, మెహ్రీన్‌ లు హీరోయిన్స్ గా అనిల్ రావిపూడి దర్శకత్వంలో వచ్చిన ఎఫ్‌ 2 మరియు ఎఫ్‌ 3 సినిమాలు ప్రేక్షకులకు వినోదాల విందు అందించాయి. ముఖ్యంగా ఎఫ్ 2 సినిమా వంద కోట్లకు పైగా వసూళ్లు నమోదు చేసి సంచలన విజయాన్ని సొంతం చేసుకున్న విషయం తెల్సిందే.

ఎఫ్‌ 3 కూడా ఆ స్థాయిలో విజయాన్ని సొంతం చేసుకుని ఉంటే ఖచ్చితంగా ఎఫ్‌ 4 సినిమా వెంటనే వచ్చి ఉండేది అనేది కొందరి అభిప్రాయం. దర్శకుడు అనిల్‌ రావిపూడి మనసులో ఇప్పటికి కూడా ఎఫ్‌ 4 ఆలోచన ఉంది అనేది ఇండస్ట్రీ వర్గాల టాక్‌. అయితే ఇప్పట్లో ఆ సీక్వెల్‌ ఉండక పోవచ్చు అనిపిస్తుంది.

ప్రస్తుతం వెంకటేష్ తో అనిల్ రావిపూడి సినిమా కు ఏర్పాట్లు జరుగుతున్నాయి. వచ్చే నెలలో వీరి కాంబో మూవీ పట్టాలెక్కబోతుంది. అంతే కాకుండా 2025 సంక్రాంతికి వీరి కాంబో మూవీ వస్తుందని కూడా ఇప్పటికే అధికారికంగా ప్రకటన రావడం చర్చనీయాంశంగా మారింది.

అనిల్‌ రావిపూడి దర్శకత్వంలో చేయబోతున్న సినిమా తర్వాత వెంకటేష్ రానా నాయుడు సీజన్‌ 3 కి సంబంధించిన షూటింగ్‌ లో పాల్గొనాల్సి ఉందట. ప్రస్తుతం రానా నాయుడు సీజన్ 2 షూటింగ్‌ లో వెంకటేష్ పాల్గొంటున్నాడు. అతి త్వరలోనే షూటింగ్‌ పూర్తి అవ్వబోతుంది.

అనిల్ రావిపూడి కూడా ఒక ప్రముఖ హీరో వారసుడి ఎంట్రీ బాధ్యతను తీసుకున్నట్లుగా తెలుస్తుంది. అందుకోసం ఏడాది పాటు ఆ ప్రాజెక్ట్‌ పైనే వర్క్ చేయాల్సి ఉంటుంది. వెంకీ మరియు అనిల్‌ లు ఇద్దరు కూడా తమ తమ ప్రాజెక్ట్‌ లతో బిజీగా ఉన్నారు.

ఇక వరుణ్ తేజ్ కూడా బ్యాక్ టు బ్యాక్ సినిమాలకు కమిట్‌ అవ్వడం వల్ల రాబోయే రెండేళ్ల పాటు ఆయన కొత్త సినిమాలకు కమిట్‌ అయ్యే పరిస్థితి లేదు. కనుక ఇప్పట్లో ఎఫ్‌ 4 ఉండక పోవచ్చు. ఇప్పట్లోనే ఉండదా... లేదంటే మొత్తానికే ఎఫ్‌ 4 ఉండదా.. అనే విషయం తెలియాలంటే మరి కొన్నాళ్లు వెయిట్‌ చేయాల్సిందే.