గుంటూరు కారం ట్రైలర్.. అదొక్కటే మైనస్

సూపర్ స్టార్ మహేశ్ బాబు, మాటల మాంత్రికుడు త్రివిక్రమ్ శ్రీనివాస్ కాంబినేషన్‌లో రానున్న చిత్రం గుంటూరు కారం. హారిక అండ్ హాసిని బ్యానరుపై ఎస్.రాధాకృష్ణ నిర్మించిన మూవీలో మహేశ్ బాబు మాస్ హీరోగా కనిపించనున్నారు. ఎన్నో వాయిదాల పడ్డ ఈ మూవీ ఎట్టకేలకు సంక్రాంతి కానుకగా రిలీజ్ కానుంది. అయితే అభిమానులు ఎంతగానో ఎదురుచూసిన ఈ మూవీ ట్రైలర్ ను మేకర్స్ ఆదివారం రాత్రి విడుదల చేశారు.

ఈ ట్రైలర్ చూస్తే మాస్ హీరోగా ఇంతవరకు కూడా మహేశ్ బాబు చేసిన సినిమాలు ఒక లెక్క .. ఈ సినిమా ఒక లెక్క అన్నట్టుగా త్రివిక్రమ్ ఈ సినిమాలో ఆయనను చూపించారు. మహేశ్ బాబు పాత్రను ఎలా డిజైన్ చేశారనేది ఈ ట్రైలర్ చూస్తే అర్థమైపోతోది. మహేశ్ సింపుల్ డైలాగ్స్.. 'ఆట సూస్తావా' అనే ఆయన మేనరిజం .. పండు మిరపకాయలు ఆరబోసిన ప్లేస్‌లో జరిగే ఫైట్ హైలైట్‌గా కనిపిస్తున్నాయి. ఇక శ్రీలీలను చూస్తూ ఆయన చెప్పే డైలాగ్స్ ఆకట్టుకుంటున్నాయి. మొత్తం మీద ఈ ట్రైలర్‌తో ఈ సినిమాపై మరింతగా అంచనాలు పెంచాలనే టీమ్ ప్రయత్నం ఫలించేలానే కనిపిస్తోంది.

యాక్షన్, రొమాన్స్, సెంటిమెంట్‍తో గుంటూరు కారం సినిమా పక్కా కమర్షియల్ చిత్రంలా కనిపిస్తోందని ఫ్యాన్స్ అంటున్నారు. మహేశ్ అభిమానులకు ఈ చిత్రం జాతరలానే ఉంటుందనే అంచనాలు రెట్టింపు అయ్యాయని నెటిజన్లు చెబుతున్నారు. ఈ ట్రైలర్ చూస్తే ఇది పక్కా పండగ సినిమా అనిపిస్తోందని కామెంట్లు పెడుతున్నారు.

ఇదంతా బాగానే ఉన్నా.. మహేశ్ ఫ్యాన్స్ లో ఓ వర్గం అభిమానులకు ట్రైలర్ నచ్చలేదట. నెట్టింట ట్రైలర్ పట్ల మేకర్స్ కు కంప్లైంట్స్ చేస్తున్నారు. ట్రైలర్ బ్యాక్ గ్రౌండ్ స్కోర్ తోపాటు మిక్సింగ్ బాలేదని అసంతృప్తిని వ్యక్తం చేస్తున్నారు. మహేశ్ చెప్పిన కొన్ని డైలాగులు క్లారిటీగా అర్థం కావడం లేదని చెబుతున్నారు. మూవీ రీ-రికార్డింగ్ పై తమన్ మరింత ఇంట్రెస్ట్ చూపించాలని సూచిస్తున్నారు.

గుంటూరు కారం చిత్రంలో మహేశ్ సరసన యంగ్ హీరోయిన్లు శ్రీలీల, మీనాక్షి చౌదరి సందడి చేయనున్నారు. జగపతి బాబు, ప్రకాష్ రాజ్, వెన్నెల కిషోర్, ఈశ్వరీ రావు, రమ్యకృష్ణ, తదితరులు కీలక పాత్రలు పోషిస్తున్నారు. సంక్రాంతి కానుకగా ఈ నెల 12వ తేదీన ఈ సినిమాను భారీ స్థాయిలో విడుదల కానుంది.