మారుతి నగర్ సుబ్రహ్మణ్యం హిందీ రీమేక్, బాలీవుడ్ సంస్థల ఆసక్తి

రావు రమేష్ ప్రధాన పాత్రలో నటించిన 'మారుతి నగర్ సుబ్రహ్మణ్యం' ఆగస్ట్ 23న థియేటర్లలో విడుదలైంది. ఈ సినిమా ఒక ఫ్యామిలీ కామెడీ డ్రామాగా ప్రేక్షకుల ముందుకు రాగా, ఓ వర్గం ప్రేక్షకులకు మంచి అనుభూతిని కలిగించింది. చిన్న సినిమాగా విడుదలైనప్పటికీ, తనదైన శైలి, వినోదాత్మక కథనంతో ప్రేక్షకులను ఆకట్టుకుంది. ఈ చిత్రానికి థియేటర్లలో మంచి స్పందన లభించింది.

దేశీయంగా మాత్రమే కాకుండా యుఎస్ఏలో కూడా మంచి కలెక్షన్లు రాబట్టడంలో విజయం సాధించింది. ఈ సినిమా విజయానికి ప్రధాన కారణం తబిత సుకుమార్ మొదటిసారి ప్రెజెంటర్‌గా మారి సినిమాను సమర్పించడం, అలాగే మైత్రీ మూవీ మేకర్స్ ఈ చిత్రాన్ని సొంతం చేసుకొని పెద్ద స్థాయిలో విడుదల చేయడం వంటి అంశాలు బాగా కలిసి వచ్చాయి.

వారి ప్రమోషన్ వల్ల సినిమా మంచి ఆదరణ పొందింది. చిన్న సినిమాగా వచ్చి పెద్ద విజయాన్ని అందుకోవడం విశేషం. ఈ చిత్ర విజయం చూసి బాలీవుడ్ నిర్మాణ సంస్థలు కూడా ఈ సినిమా పట్ల ఆసక్తి చూపుతున్నాయి. ముంబైలో ఉన్న ఒక ప్రముఖ నిర్మాణ సంస్థ 'మారుతి నగర్ సుబ్రహ్మణ్యం' హిందీ రీమేక్ హక్కులను పొందడానికి ప్రయత్నాలు ప్రారంభించిందని సమాచారం.

ఈ సంస్థ సినిమా కథ హిందీ బెల్ట్‌లో కూడా మంచి విజయం సాధించగలదని భావిస్తోంది. ఈ సినిమాను అజయ్ దేవగన్ లేదా పంకజ్ త్రిపాఠి వంటి ప్రముఖ నటులతో రీమేక్ చేయాలని ఆ సంస్థ యోచిస్తోంది. త్వరలోనే ఈ ప్రాజెక్ట్‌పై ఒక నిర్ణయం తీసుకోబోతున్నట్లు టాక్. దర్శకుడు లక్ష్మణ్ కార్య ఈ సినిమాతో తన ప్రతిభను సరిగా నిరూపించుకున్నారు. సింపుల్ గా, ప్రతి ఒక్కరికీ అర్థమయ్యే కథతో సినిమా రూపొందించడం వల్ల ప్రేక్షకులు ఆయన దర్శకత్వ ప్రతిభను మెచ్చుకున్నారు.

ఇప్పుడు టాలీవుడ్‌లో ఉన్న ప్రముఖ నిర్మాణ సంస్థల నుంచి కూడా ఆయనకు ఆఫర్లు వస్తున్నట్లు సమాచారం. త్వరలోనే ఆయన మరొక తెలుగు సినిమా చేయబోతున్నారని భావిస్తున్నారు. మొత్తానికి 'మారుతి నగర్ సుబ్రహ్మణ్యం' సినిమాతో ఈ ప్రాజెక్ట్‌లో ఉన్నవారందరికీ మంచి అవకాశాలు వచ్చాయి. నిర్మాతలు హిందీ రైట్స్ ద్వారా అదనపు లాభాలను పొందే అవకాశాలు ఉన్నాయి. అలాగే దర్శకుడు లక్ష్మణ్ కార్య ఇతర ప్రముఖ నిర్మాణ సంస్థల దృష్టిని ఆకర్షించారు.