ల్యాండ్ అయ్యాక చూస్తే ఫ్లైట్ కి చక్రం లేదు... పాక్ లో ఏం జరిగింది?

ఇటీవల కాలంలో జరుగుతోన్న పలు విమాన ప్రమాదాలు ప్రయాణికుల్లో తీవ్ర ఆందోళనలు కలిగిస్తున్న సంగతి తెలిసిందే. పైగా... విమానాల్లో లోపాలు, ప్రయాణాల్లో ఇబ్బందులు, ల్యాండింగ్ సమయంలో సమస్యలు మొదలైనవి నిత్యం ఏదో ఒక మూల దర్శనమిస్తుండటం మరింత టెన్షన్ పెడుతుందని అంటున్నారు. ఈ సమయంలో పాకిస్థాన్ లో ఓ షాకింగ్ ఘటన తెరపైకి వచ్చింది.

అవును... విమానం బాగానే టేకాఫ్ అయ్యింది.. బయలు దేరింది.. ప్రయాణం ముగించుకుని మరో విమానాశ్రయంలో కూడా బాగానే ల్యాండ్ అయ్యింది. అంతాబాగానే ఉంది కదా అనుకునే సమయంలో... సాధారణ చెక్కింగ్ వేళ.. ఆ విమానానికి ఒక చక్రం లేదన్న విషయం వెలుగులోకి వచ్చింది. దీంతో... ఈ విషయం ఒక్కసారిగా వైరల్ గా మారింది. ఆ కథాకమీషేమిటనేది ఇప్పుడు చూద్దామ్...!

పాకిస్థాన్ ఇంటర్నేషనల్ ఎయిర్ లైన్స్ (పీఐఏ) కు చెందిన ఓ దేశీయ విమానానికి ఊహించని ఘటన ఎదురైంది. లాహోర్ లో ల్యాండింగ్ సమయంలో ఆ విమానానికి ఒక చక్రం లేకపోవడాన్ని అధికారులు గుర్తించారు. దీంతో... ఒక్కసారిగా షాక్ అయ్యారు! అయితే... ల్యాండింగ్ సమయంలో ఎలాంటి అవాంఛనీయ ఘటన చోటు చేసుకోకపోవడంతో అధికారులు ఊపిరి పీల్చుకున్నారు.

పాకిస్థాన్ అంతర్జాతీయ ఎయిర్ లైన్స్ కు చెందిన విమానం పీకే-306.. కరాచీ నుంచి లాహోర్ కు బయలుదేరింది. ఈ సమయంలో... లాహోర్ విమానాశ్రయంలో దిగిన అనంతరం కెప్టెన్ రెగ్యులర్ చెక్కింగ్ చేశారు. ఆ సమయంలో.. విమానం వెనుక చక్రాల్లో ఒకటి లేదని గుర్తించారు. దీంతో... ఒక్కసారిగా షాక్ కి గురైనప్పటికీ... విమానం సేఫ్ గా ల్యాండ్ అయ్యిందని పీఐఏ అధికారులకు వెల్లడించారు.

ఈ సందర్భంగా స్పందించిన పీఐఏ ఎయిర్ లైన్స్ సంస్థ... ఈ ఘటనపై విచారణ ప్రారంభించామని వెల్లడించింది. ఇదే సమయంలో... ఆ విమానం చక్రం కరాచీలో బయలుదేరేటప్పుడే మిస్సయ్యిందా.. లేక, టేకాఫ్ సమయంలో ఊడిపోయిందా అనే విషయంపై దర్యాప్తు చేస్తున్నామని తెలిపింది.