పోతూ పోతూ గట్టిగా ఇచ్చాడుగా.. చైనాకు ట్రంప్​ భారీ షాక్​..!

మరికొన్ని రోజుల్లోనే అమెరికా అధ్యక్షుడు ట్రంప్​ పదవి నుంచి దిగిపోనున్నాడు. ఈ నేపథ్యంలో చైనాకు ట్రంప్​ లాస్ట్​పంచ్​ ఇచ్చేసి పోతున్నాడు. తన చివరి అస్త్రాన్ని చైనా మీదకు ఎక్కుపెట్టాడు. ఈ కీలక బిల్లుపై సంతకం పెట్టాడు ట్రంప్​. ఈ బిల్లు ప్రకారం.. చైనా కంపెనీలు కనుక యూఎస్​ నిబంధనలు పాటించకపోతే అమెరికా స్టాక్​ ఎక్సేంజ్​ నుంచి వాటిని తొలగిస్తారు. ఈ కీలకబిల్లుకు ట్రంప్​ రీసెంట్​గా ఆమోదం తెలిపాడు. అమెరికాలో చైనా కంపెనీలు నిబంధనలు ఉల్లంఘిస్తున్నాయని.. తప్పుడు వాణిజ్య పద్ధతులు అవలంభిస్తున్నాయని ట్రంప్​ కొంతకాలంగా ఆరోపిస్తున్నాడు.దీంతో తాజాగా ట్రంప్​ ఈ కీలక నిర్ణయం తీసుకున్నాడు.

చైనా కంపెనీలను సమీక్షించేందుకు అమెరికన్​ రెగ్యులేటర్లను కనక చైనా కంపెనీలు ఆమోదించకపోతే యూఎస్​ స్టాక్​ ఎక్స్ఛేంజీల నుంచి సదరు కంపెనీలను తొలగిస్తారు. ఇతర దేశాలకు చెందిన కంపెనీలు అమెరికాలో వ్యాపారం చేస్తున్నప్పుడు కొన్ని నిబంధనలు పాటించాలి. కానీ చైనాకు చెందిన అలీబాబా గ్రూప్​, పిండుడువో, పెట్రోచైనా వంటి కంపెనీలు ఈ రూల్స్​ ఉల్లంఘిస్తున్నట్టు సమాచారం. అందుకే ట్రంప్​ ఈ నిర్ణయం తీసుకున్నాడని వ్యాపార వర్గాలు అంటున్నాయి.

అయితే ట్రంప్​ నిర్ణయాన్ని కొందరు తప్పబడుతున్నారు. ట్రంప్​ తీసుకున్న నిర్ణయం అమెరికా చైనా మధ్య ఆరోగ్యకరమైన వ్యాపార సంబంధాలను చెడగొడుతుందని వాళ్లు అంటున్నారు. ఇటువంటి నిర్ణయాలు ట్రేడ్​ వార్​కు దారితీసే అవకాశం ఉంటుందని వారు అభిప్రాయపడుతున్నారు. అయితే తరుచూ సంచలన నిర్ణయాలు తీసుకొనే ట్రంప్​ ఈ సారి చైనా మీద పడ్డాడు. చైనా ప్రభుత్వం, అక్కడి కంపెనీలపై ట్రంప్​ గతంలోనూ అనేకసార్లు విరుచుకుపడ్డాడు. కరోనా వైరస్​ను కూడా చైనా వైరస్​ అంటూ ట్రంప్​ పేర్కొన్న విషయం తెలిసిందే.