జ‌గ‌న్‌ తో అలీ!...వైసీపీలోకి వెళ్లేందుకేనా?

టాలీవుడ్ లో హాస్య న‌టుడిగా త‌న‌కంటూ చెరిగిపోని ముద్ర వేసుకున్న అలీ... ఇప్పుడు కొత్త చ‌ర్చ‌కు తెర తీశాడు. సుదీర్ఘ‌కాలం పాటుగా సినిమాల్లో న‌టిస్తున్న అలీ... గ‌త కొంత‌కాలం నుంచి రాజ‌కీయాల‌పైనా ఆస‌క్తి క‌న‌బ‌రుస్తున్న మాట తెలిసిందే. ఈ క్ర‌మంలోనే అలీ ఏపీలో అధికార పార్టీ టీడీపీతో స‌న్నిహితంగా మెలిగార‌ని - వ‌చ్చే ఎన్నిక‌ల్లో రాజ‌మ‌హేంద్రవ‌రం పార్ల‌మెంటు స్థానం నుంచి ఆ పార్టీ అభ్య‌ర్థిగా బ‌రిలోకి దిగుతాడ‌ని కూడా మొన్న‌టిదాకా ప్ర‌చారం సాగింది. అయితే తానెంతో అభిమానించే ప‌వ‌ర్ స్టార్ ప‌వ‌న్ క‌ల్యాణ్ స్థాపించిన జ‌న‌సేన వ‌చ్చే ఎన్నిక‌ల్లో పోటీ చేస్తున్నందున... అలీ కూడా జ‌న‌సేన త‌ర‌ఫున‌నే బ‌రిలోకి దిగుతార‌ని కూడా అనుకున్నారు. సినీ ఇండ‌స్ట్రీలో ప‌వ‌న్‌ తో అత్యంత స‌న్నిహితంగా ఉండేవాళ్ల‌లో అలీ తొలి వ‌రుస‌లోనే ఉంటాడ‌ని చెప్పాలి. ఈ కార‌ణంగానే ప‌వ‌న్ న‌టించే ప్ర‌తి సినిమాలో అలీ త‌ప్ప‌నిస‌రిగా క‌నిపిస్తుంటాడు. అంతేకాకుండా ప‌వ‌న్ సినిమాల్లో అలీకి కీల‌క పాత్ర‌లు కూడా ద‌క్కుతున్న వైనం కూడా మ‌న‌కు తెలిసిందే. మొత్తంగా ప‌వ‌న్‌ కు అత్యంత స‌న్నిహితుడిగానే కాకుండా... ప‌వ‌న్‌ తో అలీ స్నేహం కూడా కాస్తంగ దృఢంగానే ఉంద‌ని చెప్పాలి. ఈ నేప‌థ్యంలో తాను రాజ‌కీయాల్లోకి రావాల‌నుకుంటే... త‌ప్ప‌నిస‌రిగా త‌న స్నేహితుడు ప‌వ‌న్ స్థాపించిన పార్టీలోనే అలీ చేర‌తాడ‌న్న విశ్లేష‌ణ‌లు కూడా సాగాయి.

ఇదంతా నిన్న‌టిదాకా సాగిన ప్ర‌చారం. అయితే ఇప్పుడు అలీ కొత్త చ‌ర్చ‌కు తెర తీశాడ‌ని చెప్పాలి. ఏ ఒక్క‌రూ ఊహించ‌ని విధంగా ఏపీలో విప‌క్ష నేత‌ - వైసీపీ అధినేత వైఎస్ జ‌గ‌న్ మోహ‌న్ రెడ్డితో అలీ భేటీ అయ్యారు. ఏ కోణంలో చూసినా... ఈ భేటీ అత్యంత ప్రాధాన్యం క‌లిగిన భేటీగానే చెప్పుకోవాలి. అటు టీడీపీ - ఇటు జ‌న‌సేన‌... ఈ రెండు పార్టీల‌ను కాద‌ని అలీ వైసీపీ అధినేత‌తో భేటీ అయ్యారంటే నిజంగానే ఆస‌క్తిక‌ర‌మే క‌దా. అందుకే... జ‌గ‌న్‌ తో అలీ భేటీ అయిన ఫొటోలు ఇప్పుడు సోష‌ల్ మీడియాలో హ‌ల్ చ‌ల్ చేస్తున్నాయి. ఈ భేటీ వెనుక అస‌లు కార‌ణాలేంటో తెలియ‌దు గానీ... మొత్తంగా జ‌గ‌న్ తో భేటీ అయిన అలీ... మొత్తం ఏపీ రాజ‌కీయాల్లో కీల‌క చ‌ర్చ‌కు తెర లేపాడు. జ‌గ‌న్‌ తో భేటీ అయిన అలీ ఆయ‌న‌తో ఏం చ‌ర్చించార‌న్న విష‌యంపై స్ప‌ష్ట‌త లేకున్నా... ఏకంగా గంట‌కు పైగా సాగిన ఈ భేటీలో జ‌గ‌న్‌ - అలీ చాలా విష‌యాలే మాట్లాడుకున్నార‌న్న టాక్ వినిపిస్తోంది. వైసీపీలో చేరే విష‌యంపైనే జ‌గ‌న్‌ తో అలీ చ‌ర్చ‌లు జ‌రిపాడా? అన్న కోణంలోనూ పెద్ద ఎత్తున చ‌ర్చ జ‌రుగుతోంది. పార్టీలో చేర‌డంతో పాటుగా వ‌చ్చే ఎన్నిక‌ల్లో తాను ప్ర‌త్య‌క్ష బ‌రిలోకి దిగుతాన‌ని - త‌న‌కు కావాల్సిన టికెట్ గురించి కూడా జ‌గ‌న్‌తో అలీ చ‌ర్చించాడ‌ని కూడా కొంద‌రు వ్యాఖ్యానిస్తున్నారు. ఎన్నిక‌ల‌కు స‌మ‌యం ద‌గ్గ‌ర‌ప‌డుతున్న ఇలాంటి కీల‌క త‌రుణంలో రాజ‌కీయాల్లోకి వ‌చ్చేస్తాడ‌నుకుంటున్న అలీ... ఎన్నికల్లో విజ‌య‌మే ల‌క్ష్యంగా ముందుకు సాగుతున్న జ‌గ‌న్‌ తో భేటీ కావ‌డ‌మే ఇందుకు నిద‌ర్శ‌నంగా కూడా చెబుతున్నారు.

ఈ వార్త‌ల్లో ఏ మేర‌కు నిజ‌ముంద‌న్న విష‌యాన్ని అటుంచితే... జ‌గ‌న్‌ తో అలీ క‌లిసి ఉన్న ఫొటో... ఎక్క‌డో బ‌య‌టో - లేదంటే ఓ గ‌దిలోనో తీసిన‌దిగా కాకుండా... విమానంలోవారిద్ద‌రూ క‌లిసి ప్ర‌యాణించిన‌ట్లుగా క‌నిపిస్తోంది. ప్ర‌స్తుతం ప్ర‌జాసంక‌ల్ప యాత్ర‌లో భాగంగా శ్రీ‌కాకుళం జిల్లాలో పాద‌యాత్ర కొన‌సాగిస్తున్న జ‌గ‌న్... హైద‌రాబాదు రావ‌డం - తిరిగి పాద‌యాత్ర‌కు వెళ్లేందుకు విమాన ప్ర‌యాణాన్నే ఆశ్ర‌యిస్తున్నారు. మ‌రోవైపు తూర్పు గోదావ‌రి జిల్లాకు చెందిన అలీ కూడా త‌ర‌చూ త‌న సొంతూరుకు వెళ్లేందుకు ఫ్లైట్ల‌నే ఆశ్ర‌యిస్తున్నాడు. ఇలాంటి త‌రుణంలో జ‌గ‌న్ పాద‌యాత్ర‌కు వెళుతున్న‌ప్పుడో - హైద‌రాబాదుకు వ‌స్తున్నప్పుడో... అలీ కూడా కాక‌తాళీయంగా అదే ఫ్లైట్‌ లో ఎక్కి ఉంటాడ‌ని - ఇత‌ర రాజ‌కీయ నేత‌ల కంటే మెరుగైన ప్ర‌జాద‌ర‌ణ క‌లిగిన నేత అయిన జ‌గ‌న్‌ తో క‌లిసి కూర్చుని ముచ్చ‌టించి ఉంటాడ‌ని కూడా కొన్ని విశ్లేష‌ణ‌లు వినిపిస్తున్నాయి. ఏది ఏమైనా జ‌గ‌న్‌ తో అలీ క‌లిసి ఉన్న ఫొటోలు ఇప్పుడు హాట్ టాపిక్‌ లా మారిపోయింది.