'ఆచార్య' ఫస్ట్ సింగిల్: వింటేజ్ మెగాస్టార్ ని చూస్తారంటున్న చరణ్..!

మెగాస్టార్ చిరంజీవి - మెగా పవర్ స్టార్ రామ్ చరణ్ కలిసి నటిస్తున్న యాక్షన్ ఎంటర్టైనర్ ''ఆచార్య''. సక్సెస్ ఫుల్ డైరెక్టర్ కొరటాల శివ ఈ చిత్రానికి దర్శకత్వం వహిస్తున్నాడు. కొణిదెల ప్రొడక్షన్స్ - మ్యాట్నీ ఎంటర్‌టైన్మెంట్స్ బ్యానర్స్‌ పై రామ్ చరణ్ - నిరంజన్ రెడ్డి కలిసి భారీ బడ్జెట్‌ తో ఈ చిత్రాన్ని నిర్మిస్తున్నారు. వేసవి కానుకగా మే 13న ఈ సినిమాను ప్రేక్షకుల ముందుకు తీసుకు రాబోతున్నారు. ఈ నేపథ్యంలో ఇప్పటికే విడుదలైన ఫస్ట్ లుక్ - టీజర్ మంచి రెస్పాన్స్ తెచ్చుకున్నాయి. అలానే ఈరోజు చరణ్ బర్త్ డే సందర్భంగా వచ్చిన 'సిద్ద' లుక్‌ కూడా ఆకట్టుకుంది. ఈ క్రమంలో ఫ్యాన్స్ ని ఖుషీ చేయడానికి చిత్ర బృందం మరో అప్డేట్ తో వచ్చింది.

'ఆచార్య' సినిమా నుంచి 'లాహే లాహే' అనే సాంగ్ లిరికల్ వీడియోను మార్చి 31న సాయంత్రం గం. 4.05 నిమిషాలకు విడుదల చేయనున్నట్లు మేకర్స్ ప్రకటించారు. ఈ సందర్భంగా రామ్ చరణ్ ట్వీట్ చేస్తూ.. ''మేము మీకు వింటేజ్ మెగాస్టార్ ని చూపిస్తామని ప్రామిస్ చేశాం.. ఆ ప్రామిస్ ని నిలబెట్టుకుంటాం !!'' అని పేర్కొన్నారు. అలానే ఈ సాంగ్ కు సంబంధించిన ఓ పోస్టర్ ని వదిలాడు. 'లాహే లాహే' పాటకు కాలు కడదుపుతున్న చిరంజీవిని చూస్తుంటే వింటేజ్ మెగాస్టార్ బ్యాక్ అనేలా ఉంది. మెలోడి బ్రహ్మ మణిశర్మ ఈ పాటకు ఎలాంటి ట్యూన్ ఇచ్చాడో తెలియాలంటే మరో మూడు రోజులు ఆగాల్సిందే.

ఇకపోతే ఈ సినిమాలో మెగాస్టార్‌ కి జంటగా కాజల్ అగర్వాల్ నటిస్తుండగా.. రామ్ చరణ్‌ కి జోడీగా పూజా హెగ్డే నటిస్తోంది. హీరోయిన్ రెజీనా కసాండ్ర ఓ స్పెషల్ సాంగ్‌ లో మెరవనుంది. తిరు ఈ చిత్రానికి సినిమాటోగ్రఫీ అందిస్తుండగా.. నవీన్ నూలి ఎడిటింగ్ బాధ్యతలు నిర్వర్తిస్తున్నారు. చిరు - చరణ్ కలిసి నటిస్తున్న 'ఆచార్య' సినిమాపై మెగా అభిమానుల్లో.. సినీ ప్రేక్షకుల్లో భారీ అంచనాలు నెలకొన్నాయి.