మహేష్ తో మరో తమిళ డైరెక్టర్

ఇప్పుడు ఏ స్టార్ హీరో కూడా ఏదో ఒక్క భాషకే పరిమితం అయిపోయే పరిస్థితి లేదు. తెలుగు హీరోలైనా.. తమిళ హీరోలైనా.. పొరుగు మార్కెట్ మీద బాగానే దృష్టిపెడుతున్నారు. తమ మార్కెట్ ను విస్తరించుకునే ప్రయత్నం చేస్తున్నారు. ఇంతకుముందు మన తెలుగు హీరోలు ఈ విషయంలో బాగా వెనుకబడి ఉండేవాళ్లు కానీ.. ఈ మధ్య వాళ్లలోనూ మార్పు వస్తోంది. ఆల్రెడీ అల్లు అర్జున్ మలయాళంలో మంచి మార్కెట్ సంపాదించాడు. ఇప్పుడు మహేష్ బాబు కళ్లు తమిళ మార్కెట్ మీద పడ్డాయి. ‘శ్రీమంతుడు’ సినిమాను భారీ ఎత్తున తమిళంలో విడుదల చేయగా.. ‘బ్రహ్మోత్సవం’ విషయంలోనూ అలాంటి ప్లానింగే జరుగుతోంది.

మరోవైపు తమిళ స్టార్ డైరెక్టర్లతో పని చేయడం ద్వారా అక్కడి మార్కెట్లోకి దూసుకెళ్లడంపై దృష్టిపెట్టాడు మహేష్. మురుగదాస్ తో చేయబోయే సినిమా తమిళంలో మహేష్ కు మంచి ఫాలోయింగ్ తెచ్చిపెడుతుందని ఆశిస్తున్నారు. మరోవైపు యువ దర్శకుడు అట్లీతోనూ కొత్తగా మహేష్ చర్చలు జరుపుతున్నట్లు సమాచారం. ‘రాజా రాణి’ లాంటి బ్లాక్ బస్టర్ లవ్ స్టోరీతో దర్శకుడిగా పరిచయమైన అట్లీ.. రెండో సినిమాకే విజయ్ లాంటి సూపర్ స్టార్ ను డైరెక్ట్ చేసి స్టార్ డైరెక్టర్ల జాబితాలో చేరిపోయాడు. ‘రాజారాణి’ తర్వాత తెలుగులో తనకు చాలా ఆఫర్లు వచ్చాయని.. త్వరలోనే తాను తెలుగు సినిమా చేయబోతున్నానని ‘పోలీసోడు’ ప్రెస్ మీట్లో చెప్పాడు అట్లీ. ఏదో మాట వరసకు ఆ మాట అన్నాడేమో అనుకున్నారు కానీ.. అట్లీ మాత్రం ఆల్రెడీ మహేష్ తో టచ్ లోకి వచ్చినట్లు సమాచారం. స్క్రిప్టు ఓకే అయితే మురుగదాస్ సినిమా తర్వాత మహేష్ అట్లీతోనే జట్టు కట్టే అవకాశాలున్నాయి.