ఒక రోజు ముందే మంచిరోజంటున్న సుధీర్

సుధీర్ బాబు మొదట సోలోగానే సినిమాల్లోకి ఎంటర్ అయినా... ఆ తరువాత మహేష్ బావగా బాగా పాపులర్ అయ్యాడు. 'ఎస్.ఎం.ఎస్' సినిమా విడుదల వరకు సుధీర్ బాబు ఎవరో కూడా తెలీదు. ఆ తరువాత మహేష్ బావగా బాగా గుర్తింపు పొందాడు. ఆ సినిమా నిరాశ పరిచినా... 'ప్రేమకథా చిత్రమ్' సినిమాతో బాగా గుర్తింపు పొందాడు. సుధీర్ బాబు నటించిన సినిమా ఆడియో ఫంక్షన్లకు మహేష్ రావడం... సుధీర్ టాలెంట్ ను పొగడటంతో ఓ రకంగా మహేష్ అభిమానులు కూడా సుధీర్ బాబు సినిమాలకు హంగామా చేయడం ప్రారంభించారు. మహేష్ అన్నట్టు.. సుధీర్ బాబుకు ఒక్క మంచి సినిమా పడాలేగానే.. ఇండస్ట్రీలో చెలరేగిపోవడం ఖాయం. ఎందుకుంటే... మిగతా కుర్రహీరోలు చేయలేని రిస్క్ స్టంట్లు సుధీర్ బాబు అవలీలగా చేయగలడు. దేహ దారుఢ్యాన్ని కూడా నేటి ట్రెండ్ కు తగ్గట్టుగా మలచుకున్నాడు. ఆరు పలకల దేహంతో మిగతా యువ హీరోల కంటే ముందున్నాడనే చెప్పొచ్చు. అలాంటి సుధీర్ మరోసారి 'భలే మంచి రోజు" సినిమాతో క్రిస్మస్ సందర్భంగా ప్రేక్షకుల ముందుకు రాబోతున్నాడు.

అయితే ఈ సినిమా బాగుందని ఫస్ట్ కాపీ చూసిన ప్రతి ఒక్కరూ మెచ్చుకోవడంతో... విడుదలకు ముందురోజు అంటే ఈనెల 24న రాత్రి 9 గంటలకు ప్రీమియర్ షో వేస్తున్నారు. ఈ షో కు సినీతారల కూడా రానున్నారట. మూసాపేటలోని శ్రీరాములు థియేటర్ లో ఈ ప్రీమియర్ షో వేస్తున్నారు. ప్రభాస్ కూడా ఈ షోకు వస్తాడనే ప్రచారం జరుగుతోంది. అలాగే ప్రిన్స్ మహేష్ వచ్చినా రావొచ్చని ఇండస్ట్రీ వర్గాలంటున్నాయి. ఇక చిత్ర యూనిట్ సభ్యుల సందడి ఎలాగూ వుంటుంది. ఇప్పటికే ఈ చిత్రం ట్రైలర్ బాగా ఆకట్టుకుంది. కిడ్నాప్ డ్రామాతో తెరకెక్కుతున్నీ 'భలే మంచి రోజు'మూవీతోనైనా రానున్న రోజులన్నీ సుధీర్ బాబుకు మంచి రోజులే అయితే... సుధీర్ మినిమమ్ గ్యారెంటీ హీరో అవ్వడం ఖాయం.