‘ఆచార్య’లో డేవిడ్ తలకాయ ప్రవేశం.. మెగాస్టార్ పాత్రలో వార్నర్ రచ్చ రచ్చ!

ఆస్ట్రేలియా స్టార్ క్రికెటర్ డేవిడ్ వార్నర్ ను ఇండియన్ సినిమా పూనినట్టుంది. బాలీవుడ్, టాలీవుడ్.. అంటూ స్టార్ హీరోల క్యారెక్టర్ ఏది నచ్చినా.. అందులో ‘తలకాయ’ ప్రవేశం చేస్తున్నారు. టాప్ సాంగ్, ఫేమస్ డైలాగ్.. ఏది కనిపించినా తనదైన స్టైల్లో ‘రీమేక్’ చేసి పడేస్తున్నాడు.

లాక్‌డౌన్ సమయంలో బాహుబలి డైలాగ్‌ అప్పజెప్పిన వార్నర్.. ఆ తర్వాత భార్యతో కలిసి బుట్టబొమ్మ సాంగ్‌ కు స్టెప్పులు ఇరగదీశాడు. ఈ డ్యాన్స్ సోషల్‌ మీడియాలో రచ్చ రచ్చ చేసింది. అయితే.. టిక్ టాక్ బ్యాన్ కావడంతో.. వెంటనే ‘రీ ఫేస్ యాప్’తో తన ప్లాట్ ఫాంను రీ ప్లేస్ చేశాడు.

రీ ఫేస్ యాప్ తో అమితాబ్, బాహుబ‌లిలో ప్ర‌భాస్‌, మ‌హ‌ర్షిలో మహేశ్‌బాబు, ద‌ర్బార్‌లో ర‌జినీకాంత్‌, స‌ల్మాన్‌ఖాన్ సినిమాల్లోని కొన్ని స‌న్నివేశాల‌ను రీఫేస్ చేశాడు. ఆ వీడియోలు ప్రేక్ష‌కుల‌ను విపరీతంగా ఆక‌ట్టుకున్నాయి.

తాజాగా.. మెగాస్టార్ చిరంజీవి ఆచార్య‌ను రీ ఫేస్ చేసిన వార్నర్.. ‘ఆచార్య డేవిడ్’గా మారిపోయాడు. రీసెంట్‌గా విడుదలైన ఆచార్య టీజర్ ను రీఫేస్ యాప్‌తో ఛేంజ్ చేశాడు. యాక్షన్ సీన్ తోపాటు.. చిరు డైలాగ్ కూడా దద్దరిల్లే పేల్చడంతో సోషల్ మీడియాలో దుమ్ములేపుతోంది. వార్నర్.. ఆ వీడియోను త‌న ఇన్‌స్టాలో పోస్ట్ చేపి ‘క‌మింగ్ సూన్’ అని రాసుకొచ్చాడు. బహుశా సినిమా రిలీజ్ గురించి అయ్యి ఉంటుంది. మొత్తానికి.. మెగాస్టార్ గా మారిపోయిన క్రికెట్ స్టార్.. ఫేస్ యాప్ తో టాప్ లేపుతున్నాడు.