మొదలుకాక ముందే లవర్ మారిపోయింది

టాలీవుడ్ లో కేరళ కుట్టీలు బాగానే సక్సెస్ లు సాధిస్తున్నారు. అప్పట్లో వచ్చిన అసిన్.. నయనతార మొదలుకొని ప్రస్తుతం సక్సెస్ లతో దూసుకెళ్తున్న కీర్తిసురేష్.. అను ఇమ్మానుయేల్ వరకు చాలామంది మళయాళీ ముద్దుగుమ్మలే. ఇంకో మళయాళీ భామ ఇక్కడ అడుగు పెట్టడానికి దాదాపుగా రెడీ అయిపోయింది. ఇంతలోనే ఆ అవకాశం చటుక్కున వేరొక సుందరిని వరించింది.

యంగ్ హీరో రాజ్ తరుణ్ హీరోగా దిల్ రాజు ప్రొడక్షన్ లో ఓ సినిమా తెరకెక్కనుంది. అలా ఎలా ఫేం డైరెక్టర్ అనీష్ కృష్ణ డైరెక్షన్ లో తీయబోయే మూవీకి లవర్ అనే టైటిల్ కూడా ఫిక్స్ చేశారు.  ఈ సినిమా కోసం కేరళకు చెందిన గాయత్రి సురేష్ ను హీరోయిన్ గా తెలుగు తెరకు పరిచయం చేయాలని అనుకున్నారు. నాలుగుపైనే మళయాళ సినిమాలు చేసిన ఈ భామ ప్రస్తుతం రెండు తమిళ సినిమాల్లోనూ హీరోయిన్ గా నటిస్తోంది. టాలీవుడ్ లో పెద్ద బ్యానర్ కావడంతో లవర్ సినిమా చేయడానికి పచ్చజెండా ఊపింది. కానీ ఇప్పుడామె ఈ ప్రాజెక్టులో టైం డిలే ఎక్కువగా ఉండటంతో ఈ ప్రాజెక్ట్ నుంచి ఆమె తప్పుకుందని తెలుస్తోంది. దీంతో ఈ ఛాన్స్ పుణే మోడల్... రిద్ధి కుమార్ ను వరించిందని ఇన్ సైడ్ టాక్.

రిద్ధి కుమార్ లాస్ట్ ఇయర్ ఫేస్ ఆఫ్ ఇండియా టైటిల్ గెలుచుకున్న యంగ్ బ్యూటీ. మోడల్ గా కూడా బాగానే పేరుతెచ్చుకుంది. క్యూట్ లుక్స్ తో కనిపించే హాట్ బ్యూటీ కావడంతో ఫిలిం మేకర్లను ఇట్టే ఆకర్షిస్తోంది. కొత్త అందాలకు రెడ్ కార్పెట్ వేసే టాలీవుడ్ రిద్ధి కుమార్ కు వెల్ కం చెప్పేసింది.