టాప్ 10 ఫుట్‌ఫాల్స్.. పుష్ప 2 ఏ స్థానంలో ఉందంటే..?

సినిమా సక్సెస్ అనేది ఇప్పుడు రకరకాల కోణాల్లో హైలెట్ అవుతోంది. ఒక్కోసారి కలెక్షన్లు, ఒక్కోసారి రికార్డులు, మరికొన్ని సందర్భాల్లో ప్రేక్షకుల అద్భుత స్పందన సినిమాను అగ్రస్థానానికి చేర్చుతుంది. అయితే అసలు సినిమా విజయం ఎంత మంది ప్రేక్షకులు థియేటర్లకు వచ్చారు అన్నదానిపై ఆధారపడి ఉంటుంది. దీనినే "ఫుట్‌ఫాల్స్" (Footfalls) అంటారు. భారతీయ సినిమా చరిత్రలో కొన్ని సినిమాలు ప్రేక్షకులను అద్భుతంగా థియేటర్లకు రప్పించాయి. వాటిలో కొన్ని గడిచిన 50-60 ఏళ్లలో కూడా ఎవరూ తాకలేని రికార్డులను నెలకొల్పాయి.

భారతీయ సినిమా చరిత్రను వెనక్కు తిరిగి చూసుకుంటే, ఒకప్పుడు థియేటర్లే ప్రధాన వినోద సాధనం. టికెట్ రేట్లు తక్కువగా ఉండటం, స్ట్రీమింగ్ ప్లాట్‌ఫామ్స్ లేకపోవడం వంటి కారణాల వల్ల కొన్ని సినిమాలు అద్భుతమైన ఫుట్‌ఫాల్స్ సాధించాయి. మగధీర, దంగల్, కేజీఎఫ్ లాంటి సినిమాలు ఎంతగా కలెక్షన్లను రాబట్టినా, ఓల్డ్ క్లాసిక్స్ ఉన్న రికార్డుల ముందు అవి తేలిపోతాయి.

1975లో వచ్చిన "షోలే" ఇప్పటికీ అత్యధికంగా 12.73 కోట్ల మంది ప్రేక్షకులను థియేటర్లకు రప్పించిన సినిమాగా నిలిచింది. అలాగే, మగల్-ఎ-ఆజం, మదర్ ఇండియా వంటి సినిమాలు దశాబ్దాల పాటు రన్ అవుతూ కలెక్షన్లు మాత్రమే కాదు, ప్రేక్షకుల స్పందనలోనూ అగ్రస్థానాల్లో నిలిచాయి.

ఇక ఇప్పటి వరకూ భారతీయ సినిమాను పరిపూర్ణంగా శాసించిన మూడు గొప్ప రికార్డులు చూస్తే, మొదటిది "షోలే". ఇది 12.73 కోట్ల ఫుట్‌ఫాల్స్‌తో ఇప్పటికీ ఓ అపరాజితమైన రికార్డుగా ఉంది. ఆ తర్వాత వచ్చిన "బాహుబలి 2" మరో అద్భుతం. ఈ సినిమా 10.77 కోట్ల మంది ప్రేక్షకులను థియేటర్లకు రప్పించి, దేశవ్యాప్తంగా ఇండస్ట్రీ రికార్డులను తిరగరాసింది. ఇక మగల్-ఎ-ఆజం, మదర్ ఇండియా లాంటి సినిమాలు కూడా భారతీయ సినిమాకు గొప్ప పేరు తెచ్చాయి.

ఒకానొక సమయంలో కలెక్షన్లు, రన్ టైమ్ మాత్రమే సినిమాకు అగ్రస్థానాన్ని ఇచ్చేవి. కానీ ఇప్పుడు పరిస్థితి మారింది. భారతీయ సినిమా బాక్సాఫీస్ రికార్డులను అంతర్జాతీయంగా హైలెట్ అవుతోంది. ఇంతకు ముందు హాలీవుడ్ సినిమాలు మాత్రమే సాధించిన రికార్డులను ఇప్పుడు ఇండియన్ సినిమాలు తిరగరాస్తున్నాయి. 2023-24 కాలంలోనే కెజిఎఫ్ 2, పఠాన్, జవాన్, సలార్ వంటి సినిమాలు భారీ వసూళ్లు రాబట్టాయి. అయితే పుష్ప 2 మాత్రం ఊహించని రీతిలో ప్రేక్షకులను ఆకర్షించింది.

చాలా తక్కువ టైమ్ లోనే "పుష్ప 2" సరికొత్త రికార్డును నెలకొల్పింది. ఈ సినిమా 6.12 కోట్ల ఫుట్‌ఫాల్స్‌ను రాబట్టి టాప్ 10 లిస్ట్‌లో ప్రవేశించింది. అంతే కాదు, ప్రపంచవ్యాప్తంగా 1800 కోట్ల గ్రాస్ వసూళ్లను సాధించింది. ఇది తెలుగు సినిమా గర్వించదగ్గ విజయంగా మారింది.

ఇక ఇప్పటి వరకు భారతీయ సినిమా చరిత్రలో అత్యధికంగా ఫుట్‌ఫాల్స్ సాధించిన టాప్ 10 సినిమాలు:

1. షోలే - 12.73 కోట్లు

2. బాహుబలి 2 - 10.77 కోట్లు

3. మగల్-ఎ-ఆజం - 9.17 కోట్లు

4. మదర్ ఇండియా - 8.89 కోట్లు

5. హమ్ ఆప్‌కే హై కౌన్ - 7.79 కోట్లు

6. గంగా జమున- 6.36 కోట్లు

7. క్రాంతి - 6.15 కోట్లు

8. పుష్ప 2 - 6.12 కోట్లు

9. ముకద్దర్ కా సికందర్ - 6.07 కోట్లు

10. సంగం - 5.71 కోట్లు