శాతకర్ణి ఫస్ట్ లుక్ ఆ రోజేనా?

షూటింగ్ మొదలై నాలుగు రోజులు కాలేదు.. అప్పుడే ఫస్ట్ లుక్ గురించి చర్చ ఏంటి అంటారా..? ఐతే క్రిష్ మాత్రం షూటింగ్ మొదలవ్వడానికి ముందే ప్రమోషనల్ స్ట్రాటజీ కూడా పక్కగా ప్రిపేర్ చేసుకుని రంగంలోకి దిగాడట. ఎప్పుడు ఫస్ట్ లుక్ రిలీజ్ చేయాలి.. ఎప్పుడు టీజర్ వదలాలి.. సినిమాను ఇంకా ఏ రకంగా ప్రమోట్ చేయాలి.. ఎప్పుడూ ఎలా వార్తల్లో ఉంచాలి.. అనేది ఎప్పుడో ప్లాన్ చేసేశాడట. ‘బాహుబలి’ తరహాలో సినిమాను ప్రమోట్ చేసి.. హైప్ తీసుకురావాలన్నది క్రిష్ ప్రణాళిక అంటున్నారు ‘గౌతమీపుత్ర శాతకర్ణి’ యూనిట్ సభ్యులు. ఈ సినిమా ఫస్ట్ లుక్ పోస్టర్ జూన్ 10న నందమూరి బాలకృష్ణ పుట్టిన రోజు సందర్భంగా విడుదల చేయబోతున్నట్లు సమాచారం.

మొరాకోలో మూడు రోజుల క్రితమే ‘గౌతమీపుత్ర శాతకర్ణి’ రెగ్యులర్ షూటింగ్ ఆరంభమైన సంగతి తెలిసిందే. అక్కడ రూ.8 కోట్ల ఖర్చుతో భారీ లెవెల్లో వార్ సీక్వెన్స్ తీస్తున్నారు. ఈ ఎపిసోడ్ నుంచే ‘శాతకర్ణి’ ఫస్ట్ లుక్ తీసుకుని దాన్ని స్పెషల్‌ గా తీర్చిదిద్దుతారట. బాలయ్య పుట్టిన రోజు కానుకగా దీన్ని విడుదల చేస్తారట.

బాలయ్య కెరీర్లో అత్యంత ప్రతిష్టాత్మకంగా తెరకెక్కుతున్న వందో సినిమాకు ప్రారంభోత్సవం రోజే మంచి హైప్ తీసుకురావడంలో క్రిష్ సక్సెస్ అయ్యాడు. సొంతంగా రూ.70 కోట్ల బడ్జెట్‌ తో సినిమా తీస్తున్న క్రిష్.. ఆ బడ్జెట్ వర్కవుటయ్యేలా ప్రమోషనల్ స్ట్రాటజీతో బరిలోకి దిగాడు. ఇప్పటిదాకా అంత బాగానే సాగింది. ఇకముందూ సరిగ్గా ప్రమోట్ చేస్తూ వెళ్తే ‘బాహుబలి’ తరహాలో ‘గౌతమీపుత్ర శాతకర్ణి’కి కూడా మంచి హైప్ రావడం ఖాయం.