60 ల స్టార్లతో అప్పుడే చేస్తే కెరీర్ ఏమౌతుందో?

'మహానటి' సినిమా తర్వాత నటిగా కీర్తి సురేష్ రేంజ్ పెరిగిందనేది వాస్తవం. కీర్తి కెరీర్ మహానటికి ముందు మహానటికి తర్వాత అన్నట్టు మారింది. అందుకే ఆ సినిమా తర్వాత కథలను ఆచితూచి ఎంపిక చేసుకుంటోంది. కీర్తి ప్రస్తుతం నటిస్తున్న సినిమాల్లో మెజారిటీ వుమన్ ఓరియంటెడ్ సినిమాలే.  ఇదిలా ఉంటే కీర్తి సురేష్ ను రజనీకాంత్ నెక్స్ట్ ఫిలిం లో హీరోయిన్ గా తీసుకుంటున్నారని సమాచారం.

రజనీ ఈమధ్యే ఎఆర్ మురుగదాస్ దర్శకత్వంలో తెరకెక్కుతున్న 'దర్బార్' సినిమా షూటింగ్ ను పూర్తిచేశారు.  ఈ సినిమా సంక్రాంతికి రిలీజ్ కానుంది.  'దర్బార్' తర్వాత సిరుతాయ్ శివ దర్శకత్వంలో నటించేందుకు రజనీ గ్రీన్ సిగ్నల్ ఇచ్చారు.  తమిళ స్టార్ హీరో అజిత్ తో వరసగా 'వేదాళం'.. 'వీరమ్'.. వివేగం'.. 'విశ్వాసం'  సినిమాలను రూపొందించిన దర్శకుడే ఈ శివ.  ఈ సినిమాలోనే కీర్తిని హీరోయిన్ గా ఫైనలైజ్ చేశారట.  కీర్తి కూడా ఈ సినిమాకు యస్ చెప్పిందని అంటున్నారు.

రజనీ సరసన నటించడం కోసం చాలామంది హీరోయిన్లు ఎదురు చూస్తుంటారు. రజనీ సినిమాలో ఆఫర్ రావడం గొప్పవిషయమే.. అయితే రజనీ సినిమాలో హీరోయిన్ గా నటించిన తర్వాత యంగ్ హీరోలు.. ఈ జెనరేషన్ స్టార్ హీరోలు కీర్తి తో నటించేందుకు ఇంట్రెస్ట్ చూపే అవకాశం ఉండదు.  ఒకసారి 60 లలో ఉండే వెటరన్ హీరోలతో జట్టుకట్టిన హీరోయిన్లతో రొమాన్స్ చేసేందుకు ఈ జెనరేషన్ హీరోలు ఇంట్రెస్ట్ చూపించకపోవడం మనం చూస్తూనే ఉన్నాం. కీర్తి సురేష్ కెరీర్ కు ఇది ఇబ్బందికరంగా మారే అవకాశం లేకపోలేదు. మరి నయనతార లాగా వీటన్నిటికీ అతీతం అనిపించుకుంటుందా లేదా అనేది మాత్రం వేచి చూడాలి.