‘జై లవకుశ’ సీక్రెట్ తెలిసిపోయింది

‘జై లవకుశ’ విడుదలకు ముందు ఈ సినిమాకు సంబంధించి ఒక విషయాన్ని సస్పెన్సులో పెట్టేశాడు జూనియర్ ఎన్టీఆర్. ఈ సినిమా చేయాలా వద్దా అన్న డైలమాలో ఉన్నపుడు తనకు అత్యంత సన్నిహితులైన ఇద్దరు దర్శకుల్ని సలహా అడిగానని.. వాళ్లిద్దరూ ఓకే అన్నాకే ఈ సినిమా చేశానని అన్నాడు తారక్. ఐతే ఆ ఇద్దరు దర్శకులెవరన్నది వెల్లడించలేదు. సినిమా రిలీజయ్యాక చెబుతానన్నాడు. అప్పట్నుంచి ఎన్టీఆర్ అభిమానులు ఆ ఇద్దరు దర్శకులు ఎవరా అన్న గెస్సింగ్ లో పడిపోయారు. ఎస్.ఎస్.రాజమౌళి.. వి.వి.వినాయక్.. కొరటాల శివల చుట్టూ వాళ్ల ఆలోచనలు తిరిగాయి.

ఐతే ‘జై లవకుశ’ విడుదలై నెల రోజులవుతున్నా ఇంకా ఎన్టీఆర్ ఆ ఇద్దరు దర్శకులెవరో వెల్లడించలేదు. ఎన్టీఆర్ చెప్పడానికంటే ముందు ‘జై లవకుశ’ రచయిత కోన వెంకట్ ఈ సీక్రెట్ రివీల్ చేసేశాడు. ట్విట్టర్లో ఓ అభిమాని అడిగిన ప్రశ్నకు జవాబుగా ఈ సంగతి చెప్పాడు కోన. ఆ ఇద్దరు దర్శకులు ఎస్.ఎస్.రాజమౌళి.. కొరటాల శివలేనట. దీంతో అభిమానుల అంచనాలు కరెక్టే అని తేలిపోయింది. ఎన్టీఆర్‌ కు వీళ్లిద్దరూ అత్యంత సన్నిహితులు. తారక్ తో ‘స్టూడెంట్ నెంబర్ వన్’.. ‘సింహాద్రి’.. ‘యమదొంగ’ లాంటి హ్యాట్రిక్ హిట్స్ ఇచ్చిన రాజమౌళి.. తనను ఎప్పుడూ గైడ్ చేస్తూనే ఉంటాడు. కొరటాల కొంచెం లేటుగా తారక్ ఫ్రెండయ్యాడు. అతను కూడా ఆత్మీయుడే. వీళ్లిద్దరి కాంబినేషన్లో ‘జనతా గ్యారేజ్’ లాంటి సూపర్ హిట్ వచ్చిన సంగతి తెలిసిందే.