మంచు లక్ష్మిని మళ్లీ అవమానించరు కదా..

తెలుగులో తొలి సినిమా ‘అనగనగా ఓ ధీరుడు’తో నంది అవార్డు అందుకుని ఆశ్చర్యపరిచింది మంచు లక్ష్మి. తర్వాత కొంత కాలానికే ఆమె మణిరత్నం లాంటి లెజెండరీ డైరెక్టర్ తో ‘కడలి’ సినిమా చేసే అవకాశం అందుకుంది. ఎంతో ఉత్సాహంగా ఆ సినిమాలో నటించింది కానీ విడుదల తర్వాత ఆమె ఆనందం ఆవిరైంది. లక్ష్మితో ముడిపడ్డ సన్నివేశాలకు చాలా వరకు కోత వేసి సినిమాను రిలీజ్ చేశాడు మణి. ఈ విషయంలో మంచు లక్ష్మి చాలా ఫీలైంది. ఆమెకు అవమానం జరిగినట్లు భావించారు ప్రేక్షకులు. ఆ తర్వాత లక్ష్మి మళ్లీ ఇంకో తమిళ సినిమా చేయలేదు. తెలుగుకే పరిమితమైంది.

ఐతే ఇంత కాలానికి లక్ష్మి మళ్లీ ఓ కోలీవుడ్ సినిమాలో నటించబోతోంది. జ్యోతిక ప్రధాన పాత్రలో నటించబోయే సినిమాలో లక్ష్మి ఓ కీలక పాత్రలో కనిపించనుంది. ఈ చిత్రం హిందీలో విజయవంతమైన ‘తుమ్హారి సులు’కు రీమేక్. ‘గగనం’.. ‘ఆకాశమంత’ సినిమాలు రూపొందించిన రాధామోహన్ దర్శకత్వం వహించనున్నాడు. జ్యోతిక భర్త సూర్యనే స్వయంగా ఈ చిత్రాన్ని నిర్మించబోతున్నాడు. హిందీలో నేహా ధూపియా పోషించిన ఎఫ్ం ఛానెల్ హెడ్ క్యారెక్టర్లో లక్ష్మి కనిపించనున్నట్లు సమాచారం. జ్యోతిక రీఎంట్రీలో చేసిన సినిమాల్లో ఏవీ తెలుగులో రిలీజవ్వలేదు. ఐతే లక్ష్మిని తీసుకోవడం వల్ల ఈ చిత్రాన్ని తెలుగులో కూడా విడుదల చేసేందుకు అవకాశముంటుందని భావిస్తున్నారు. మరి లక్ష్మిని ఈసారైనా సరిగ్గా ఉపయోగించుకుంటారా.. లేక మణిరత్నం లాగా చేస్తారా అన్నది చూడాలి.