చెన్న‌య్ ఫ్యాక్ట‌రీలో ప్రిన్స్‌ కేం ప‌ని?

మ‌హేష్ హీరోగా శ్రీ‌కాంత్ అడ్డాల ద‌ర్శ‌క‌త్వంలో బ్ర‌హ్మోత్స‌వం తెర‌కెక్కుతున్న సంగ‌తి తెలిసిందే. పీవీపీ ఈ చిత్రాన్ని తెలుగు - త‌మిళ్‌ లో ఎంతో ప్ర‌తిష్ఠాత్మ‌కంగా నిర్మిస్తున్నారు. ఓ ర‌కంగా ప్రిన్స్‌ కి ఇది అధికారికంగా స్ర్టెయిట్ త‌మిళ్ సినిమా. అందుకే ఎంతో శ్ర‌ద్ధ తీసుకుని న‌టిస్తున్నాడు. ఇక అత‌డి స‌ర‌స‌న కాజ‌ల్‌ - స‌మంత‌ - ప్ర‌ణీత క‌థానాయిక‌లుగా న‌టిస్తున్నారు. తాజా షెడ్యూల్ కోసం యూనిట్ చెన్న‌య్ ఇండ‌స్ర్టియ‌ల్ కారిడార్ వెళుతోంది.

ఇటీవ‌లి కాలంలో మెజారిటీ భాగం చిత్రీక‌ర‌ణ రామోజీ ఫిలింసిటీలో సాగింది. త‌దుప‌రి షెడ్యూల్ కోసం ఊటీ వెళ్లారు. తాజా షెడ్యూల్ కోసం చిత్ర‌యూనిట్ చెన్న‌య్ వెళ్లింద‌ని స‌మాచారం. అక్క‌డ ఓ ఫ్యాక్ట‌రీలో కీల‌క‌మైన స‌న్నివేశాల్ని తెర‌కెక్కించ‌నున్నారు. ప్రిన్స్ మ‌హేష్ - స‌త్య‌రాజ్‌ ల‌పై ఈ సీన్స్ ఉన్నాయి. అయితే ద‌ర్శ‌కుడు ఇటీవ‌లే చెన్న‌య్‌ లోని ప‌లు లొకేష‌న్ల‌ను ప‌రిశీలించి, చివ‌రికి అంబ‌త్తూర్ ఇండ‌స్ర్టియ‌ల్ ఏరియా సూట‌బుల్ అని భావించారుట‌. సంక్రాంతికి ముందు అక్క‌డ ఈ స‌న్నివేశాల్ని తెర‌కెక్కిస్తార‌ని తెలుస్తోంది.

ఇంట్రెస్టింగ్ మ్యాట‌ర్ ఏమంటే అస‌లు ప్రిన్స్ పుట్టి పెరిగింది చెన్న‌య్‌ లోనే. విద్యాభ్యాసం అంతా అక్క‌డే. అత‌డికి త‌మిళం బాగా వ‌చ్చు. త‌న సొంత ప్లేస్‌ లో న‌టిస్తున్న అపూర్వ అనుభూతి క‌లుగుతుంది ఇప్పుడు. ఇటీవ‌లే సెల్వంద‌న్ (శ్రీ‌మంతుడు) చిత్రాన్ని ప్ర‌మోట్ చేసేందుకు కొన్ని నెల‌ల‌పాటు చెన్న‌య్ న‌గ‌రంలో గ‌డిపాడు. ఇప్పుడు మ‌ళ్లీ చెన్న‌య్ వెళ్లే సంద‌ర్భం వ‌చ్చింది. మ‌హాన‌గ‌రంతో త‌న అనుబంధాన్ని ప్రిన్స్ మ‌రోమారు రీకాల్ చేసుకుంటాడ‌న్న‌మాట‌!