వైజయంతికి సెకండ్ లైఫ్ ఇస్తున్న అల్లుడు!

జామాతా దశమ గ్రహః అనే నానుడి ఉంది.  నవగ్రహాలకు తోడుగా అల్లుడు పదో గ్రహం తరహాలో పట్టి పీడిస్తూ ఉంటాడని ఎప్పటి నుంచో టాక్ ఉంది. పాత కాలంలో ఈ కొటేషన్ నిజమే.  ఈ కాలంలో కొంతవరకూ నిజమే కానీ అదే నిజం కాదు. స్వర్గీయ అల్లు రామలింగయ్య అల్లుడు చిరంజీవి మెగాస్టార్ చిరంజీవి తన మామగారికి ఎంతో గౌరవం తీసుకొచ్చారు.  ఇక ఈ జెనరేషన్ లో కూడా అలాంటి వారు ఉన్నారు.  యువ దర్శకుడు నాగ్ అశ్విన్ ఇదే బాటలో ఉన్నారని చాలామంది అభిప్రాయపడుతున్నారు.

స్టార్ ప్రొడ్యూసర్ అశ్వినిదత్ వైజయంతి మూవీస్ బ్యానర్ పై ఎన్నో బ్లాక్ బస్టర్స్ నిర్మించారు. అయితే 'శక్తి'.. 'కంత్రి'.. 'కథానాయకుడు' లాంటి వరస డిజాస్టర్లతో బ్యానర్ ఇమేజ్ మసకబారింది  అశ్వినిదత్ అల్లుడు నాగ్ అశ్విన్ దర్శకత్వంలో తెరకెక్కిన 'మహానటి' వైజయంతి బ్యానర్ కు కమర్షియల్ విజయాన్ని అందించడమే కాకుండా బ్యానర్ కు మంచి పేరు తీసుకొచ్చింది. దీనికి ముందు అశ్విని దత్ కుమార్తె స్వప్న సినిమాస్ బ్యానర్ పై  నిర్మించిన 'ఎవడే సుబ్రమణ్యం' కూడా మంచి పేరు తీసుకొచ్చింది.

ఇదిలా ఉంటే తాజాగా వైజయంతి మూవీస్ బ్యానర్ పై నాగ్ అశ్విన్ - ప్రభాస్ సినిమా ప్రకటన రావడం ఒక్కసారిగా అందరి దృష్టిని ఆకర్షించింది.  ఇంతవరకూ వైజయంతి బ్యానర్ లో తెరకెక్కిన సినిమాలు తెలుగు రాష్ట్రాల స్థాయి మాత్రమే.. ఈసారి మాత్రం ఈ ప్రాజెక్ట్ ప్యాన్ ఇండియా స్థాయి.  ఈ సినిమా నాగ్ అశ్విన్ వల్లే సాకారం అయిందని చెప్పడంలో ఏమాత్రం సందేహం లేదు.  ఈ సినిమా హిట్ అయితే వైజయంతి మూవీస్ బ్యానర్ పేరు దేశవ్యాప్తంగా మార్మోగడం ఖాయం. ఏదేమైనా అశ్విని దత్ అల్లుడుగారు సూపర్ అనే చెప్పాలి!