ఆ సినిమా ఏమైంది చైతూ

నెల క్రితం ‘మజ్ను’ షూటింగ్ మొదలుబెట్టాడు అక్కినేని నాగచైతన్య. యువ దర్శకుడు చందూ మొండేటి జెట్ స్పీడుతో సినిమా తీసేస్తున్నాడు. ఇప్పటికే ఓ షెడ్యూల్ పూర్తయిపోయింది. రెండో షెడ్యూల్ కోసం రాజమండ్రికి వెళ్లింది యూనిట్. చైతూ స్పీడ్ చూస్తుంటే అతను డేట్లు పూర్తిగా ఈ సినిమాకే కేటాయించినట్లున్నాడు. దీనికి ముందు చేస్తున్న ‘సాహసం శ్వాసగా సాగిపో’ షూటింగ్ విషయంలో అతడి పార్ట్ ఏమీ బ్యాలెన్స్ ఉన్నట్లుగా లేదు. ‘మజ్ను’ మొదలవడానికి ముందే ఈ సినిమా షూటింగ్ అంతా అయిపోయినట్లు చెబుతున్నారు. కానీ ఆ సినిమా ఎప్పుడు విడుదలవుతుందన్నదే తేలడం లేదు.

డిసెంబర్లోనే ‘సాహసం శ్వాసగా సాగిపో’ను రిలీజ్ చేస్తారని ఆ మధ్య ప్రచారం జరిగింది. ట్రైలర్ వచ్చి కూడా చాలా రోజులైంది. మరి ఆడియో సంగతేంటో.. రిలీజ్ మాటేంటో తెలియట్లేదు. ఈ సినిమాను తమిళంలో శింబుతో తీస్తున్నాడు గౌతమ్ మీనన్. చైతూ షెడ్యూల్ ప్రకారం సినిమా పూర్తి చేస్తే శింబు మాత్రం డుమ్మా కొట్టి తనను ఇబ్బంది పెట్టాడని ఓ కార్యక్రమంలో మొహమాటం లేకుండా చెప్పేశాడు గౌతమ్. పైగా ఈ మధ్య చెన్నై వరదలు వచ్చి పడ్డాయి. శింబు బీప్ సాంగ్ వివాదంలోనూ చిక్కుకున్నాడు. ఈ నేపథ్యంలో తమిళ వెర్షన్ కు సంబంధించి వర్క్ బ్యాలెన్స్ ఉండొచ్చని.. రెంటినీ ఒకేసారి విడుదల చేయాలని కాబట్టి ఆలస్యం అవుతుండొచ్చని అంటున్నారు. జనవరిలో ఎలాగూ ఖాళీ ఉండదు కాబట్టి చైతూ-గౌతమ్ జంటకు అచ్చొచ్చిన ఫిబ్రవరిలో ఈ చిత్రాన్ని ప్రేక్షకుల ముందుకు తెస్తారేమో. వీళ్లిద్దరి కాంబినేషన్లో వచ్చిన ‘ఏమాయ చేసావె’ ఫిబ్రవరిలోనే విడుదలైంది.