మెగా మేనల్లుడి మీదే భారం వేస్తే..

ఎప్పుడో ఏడాది కిందట మొదలైంది ‘నక్షత్రం’ సినిమా. ఆరు నెలల్లో పూర్తి చేసి రిలీజ్ చేసేయాలని భావించారు. కానీ ఇప్పటిదాకా సినిమా రిలీజ్ కు నోచుకోలేదు. ఇప్పుడిప్పుడే రిలీజయ్యేలాగా కూడా కనిపించలేదు. సినిమా మొదలైనపుడు జనాల్లో బాగానే ఆసక్తి కనిపించింది. పైగా మొదట్లో ప్రమోషన్ కూడా కొంచెం గట్టిగానే చేశారు. రామ్ చరణ్ చేతుల మీదుగా 10 ఫస్ట్ లుక్స్ రిలీజ్  చేయడం.. క్యారెక్టర్లను పరిచయం చేయడం.. ఇలా సినిమాను వార్తల్లో నిలబెట్టే ప్రయత్నం చేశారు. కానీ ఆ తర్వాత సినిమా వార్తల్లో లేకుండా పోయింది. గత మూడు నాలుగు నెలలుగా ఏ అప్ డేట్ లేదు. ‘నక్షత్రం’ ఊసే వినిపించడం లేదు ఎక్కడా.

గత ఏడాది ‘నక్షత్రం’ మొదలయ్యే సమయానికే హీరో సందీప్ కిషన్ పరిస్థితి అయోమయంగా ఉంది. అప్పటికి ‘రన్’ తేడా కొట్టేసింది. ఆ తర్వాత ‘ఒక్క అమ్మాయి తప్ప’ పంచ్ పడింది. ఈ మధ్యే వచ్చిన ‘నగరం’ కూడా నిలబడలేదు. ఇది కచ్చితంగా ‘నక్షత్రం’ మీద ప్రభావం చూపేదే. మరోవైపు ఈ చిత్రంలో అతిథి పాత్ర చేస్తున్న మెగా మేనల్లుడు సాయిధరమ్ తేజ్ మీదే ఆశలుపెట్టుకున్నారు. ముందు 20 నిమిషాలనుకున్న పాత్రను ఇంకా పెంచినట్లు కూడా ఊహాగానాలు వినిపించాయి. అతణ్ని ముందు పెట్టి సినిమాను ప్రమోట్ చేయాలనుకున్నారు. కానీ తేజు కూడా ‘తిక్క’.. ‘విన్నర్’ లాంటి ఫ్లాపులతో దెబ్బ తిన్నాడు. మరోవైపు హీరోయిన్ రెజీనా.. ప్రగ్యా జైశ్వాల్ ల పరిస్థితి కూడా అంతంతమాత్రంగానే ఉంది. ప్రకాష్ రాజ్.. జేడీ చక్రవర్తి లాంటి వాళ్లు కూడా ఇప్పుడు లైమ్ లైట్లో లేరు. ఈ నేపథ్యంలో ‘నక్షత్రం’కు మళ్లీ ఎలా హైప్ తీసుకొస్తారో.. సినిమాను ఎలా ప్రమోట్ చేసి.. ఎప్పుడు రిలీజ్ చేస్తారో చూడాలి.

Like Us on Facebook : https://www.facebook.com/Tupakidotcom/