గుర్తు పట్టలేని అవతారంలో రాజ్ తరుణ్!

పాత్ర కోసం తప్పనిసరి అయినా కూడా గుండు చేయించుకునే హీరోలు చాలా తక్కువమంది. ఇక మామూలుగా అయితే అస్సలు గుండు చేయించుకోరు. ఐతే ఈ మధ్య కొందరు యువ కథానాయకులు మాత్రం నెత్తిన జుట్టు తీయించుకుని ఆశ్చర్యపరుస్తున్నారు. ఆ మధ్య ‘కార్తికేయ’ సినిమా తర్వాత ఆ చిత్ర దర్శకుడు చందూ మొండేటితో కలిసి హీరో నిఖిల్ తిరుమలకు వెళ్లి గుండు చేయించుకుని షాకిచ్చిన సంగతి తెలిసిందే. తాజాగా ఇప్పుడు మరో యంగ్ హీరో గుండు చేయించుకున్నాడు. అతనే.. రాజ్ తరుణ్. గత వారాంతంలో రాజ్ కొత్త సినిమా ‘లవర్’ ప్రేక్షకుల ముందుకొచ్చిన సంగతి తెలిసిందే. తన ప్రతి కొత్త సినిమా విడుదల సందర్భంగా నిర్మాత రాజు తిరుమలకు వెళ్తుంటాడు. ఆయనతో పాటు హీరో రాజ్ తరుణ్.. హీరోయిన్ రిద్ధి కుమార్ కూడా తిరుమల వెళ్లారు.

దర్శనానంతరం రాజ్ గుండుతో గుడి బయట కనిపించగా.. చాలామంది ముందు అతడిని గుర్తు పట్టలేదు. కొంతసేపటి తర్వాత కానీ అతను రాజ్ అన్న సంగతి జనాలకు తెలియలేదు. దీంతో కొందరు అతడితో ఫొటోలు దిగారు. రాజ్ వెంట హీరోయిన్ రిద్ధి కూడా ఉంది. ఐతే ఎన్నో ఆశలు పెట్టుకున్న ‘లవర్’ రాజ్ తరుణ్ కు చేదు అనుభవాన్నేమిగిల్చింది. పేలవమైన టాక్ తో మొదలైన ఈ చిత్రం పూర్ ఓపెనింగ్స్ తెచ్చుకుంది. ఈ చిత్రం రాజ్ ఖాతాలో మరో డిజాస్టర్ అనడంలో సందేహం లేదు. దిల్ రాజు లాంటి అగ్ర నిర్మాత కూడా రాజ్ ను కాపాడని నేపథ్యంలో ఇక అతడి కెరీర్ ఏమవుతుందో చూడాలి.