‘బోస్’ మీద సెన్సేషనల్ మూవీ

గాంధీ గురించి తెలుసు.. నెహ్రూ గురించి తెలుసు.. వల్లభాయ్ పటేల్ గురించి కూడా తెలుసు.. ఇంకా స్వాతంత్ర్య పోరాటంలో కీలక పాత్ర పోషించి.. దేశం నిర్మాణంలోనూ భాగమైన గొప్ప నేతలు చాలామంది గురించి మనకు చాలా తెలుసు. కానీ సుభాష్ చంద్రబోస్ గురించి మాత్రం జనాలకు తెలిసింది తక్కువ. ఆయన జీవితం ఎంతో నిగూఢమైంది. ఆయన మరణమే పెద్ద మిస్టరీ. బోస్ జీవితం ఎలా ముగిసిందన్నది ఇప్పటికే అంతుచిక్కని విషయమే. బోస్ కథ ముగిసి ఎన్నో దశాబ్దాలు దాటినా.. ఆయన గురించి తెలుసుకోవాలన్న ఆసక్తి జనాల్లో ఇప్పటికీ ఉంది. ఈ ఆసక్తిని గమనించే బోస్ జీవితంపై సినిమా తీసే ప్రయత్నంలో ఉంది బాలాజీ ప్రొడక్షన్స్ సంస్థ.

బోస్ జీవిత కథతో ‘బోస్: డెడ్ ఆర్ అలైవ్’ అనే సినిమా రాబోతోంది హిందీలో. ‘డెడ్ ఆర్ అలైవ్’ అన్న ట్యాగ్ లైన్ చూస్తేనే.. ఆయన మరణం తాలూకు మిస్టరీ మీదే సినిమా నడుస్తుందని అర్థమవుతోంది. ఏ పాత్రనైనా అలవోకగా చేసేసే యువ నటుడు.. జాతీయ అవార్డు గ్రహీత రాజ్ కుమార్ రావు ఈ చిత్రంలో బోస్ పాత్రలో కనిపించబోతున్నాడు. ఒక ఇంట్రెస్టింగ్ టీజర్ తో ఈ సినిమా గురించి జనాలకు పరిచయం చేశారు దర్శక నిర్మాతలు. ప్రముఖ దర్శకుడు హన్సల్ మెహతా ఈ చిత్రాన్ని రూపొందించనున్నాడు. టీజర్లో జస్ట్ బోస్ గా రాజ్ కుమార్ రావు లుక్ మాత్రమే చూపించారు. అయినప్పటికీ అందులో ఒక ఇంటెన్సిటీ కనిపిస్తోంది. మామూలుగా రాజ్ కుమార్ రావును చూస్తే బోస్ గా ఏమాత్రం సూటవుతాడో అనిపిస్తుందేమో కానీ.. ఈ టీజర్లో.. మేకర్స్ రిలీజ్ చేసిన మరో లుక్ చూస్తే అతను బోస్ గా ఎంత బాగా ట్రాన్స్ ఫామ్ అయ్యాడో తెలుస్తుంది. ఈ సినిమా కచ్చితంగా ఓ సెన్సేషన్ అవుతుందని భావిస్తున్నారు. వచ్చే ఏడాది ఈ చిత్రం ప్రేక్షకుల ముందుకొస్తుంది.

Full View